काठमाडौं, १० फागुन । नेपाली कांग्रेसका प्रवक्ता देवराज चालिसेले कांग्रेस उम्मेदवारहरूमाथि दुर्व्यवहार र आक्रमणका घटना भइरहेको आरोप लगाएका छन्।

प्रतिनिधिसभा निर्वाचनको तयारी र समसामयिक विषयमा धारणा सार्वजनिक गर्न आइतबार सानेपास्थित पार्टी केन्द्रीय कार्यालयमा आयोजित पत्रकार सम्मेलनमा उनले यस्तो बताएका हुन् ।

उनले फागुन २१ गते हुने निर्वाचन नजिकिँदै गर्दा कांग्रेस उम्मेदवारलाई अपमान र दुर्व्यवहार गर्ने काम बढेको भन्दै तत्काल त्यस्ता गतिविधि रोक्न माग गरे।

‘फागुन २१ गतेको निर्वाचन नजिकिँदै गर्दा कांग्रेस उम्मेदवारलाई दुर्व्यवहार र अपमान गर्ने काम भइरहेको छ। यो तत्काल बन्द गर्नुपर्छ,’ चालिसेले भने।

सरकारले निष्पक्ष निर्वाचनको वातावरण बनाउनुपर्नेमा जोड दिँदै उनले कांग्रेसले हालसम्म निर्वाचन प्रक्रियामाथि शंका नगरेको स्पष्ट पारे। ‘सरकारले निष्पक्ष निर्वाचनको वातावरण बनाउनुपर्छ। कांग्रेसले अहिलेसम्म शंका गरिसकेको छैन,’ उनले भने।

चालिसेले कांग्रेसले भयको राजनीति नगर्ने बताए। ‘कांग्रेसले भयको राजनीति गर्दैन। हामी दृढ भएर चुनावी प्रचारमा लाग्न उम्मेदवार र नेता कार्यकर्तालाई आग्रह गर्छौँ,’ उनले भने।

निर्वाचनको माहोलमा धार्मिक सद्भाव बिगार्ने गतिविधि नगर्न उनले सबै पक्षलाई सचेत गराए। ‘निर्वाचन आइसकेको अवस्थामा जनता जनताबीचको धार्मिक सद्भाव बिगार्नु हुँदैन,’ उनले भने।

व्यक्तिगत गालीगलौज र पार्टीका झण्डा जलाउने कार्य निन्दनीय भएको उल्लेख गर्दै उनले दाङको तुलसीपुरमा एमालेको झण्डा जलाइएको घटनाको पनि कांग्रेसले निन्दा गरेको जानकारी दिए।

‘व्यक्तिगत गालीगलौज र पार्टीका झण्डा जलाउने कार्य निन्दनीय छन्। एमालेको झण्डा दाङको तुलसीपुरमा जलाइएको घटनाको पनि कांग्रेसले निन्दा गरेको छ,’ उनले भने।

पत्रकार सम्मेलनमा उनले नेपाली कांग्रेसप्रति जनआकर्षण बढ्दै गएको दाबी गरे। ‘नेपाली कांग्रेसप्रति आकर्षण चुलिएको छ। नेकपा एमाले र राष्ट्रिय स्वतन्त्र पार्टीका शीर्ष नेताहरू नै कांग्रेसमा भित्रिएका छन्,’ उनले भने।

साथै उनले अन्य पार्टीमा आवद्ध भएका तथा पार्टी छाडेका नेताकार्यकर्तालाई कांग्रेसमा फर्किन आह्वान गरे। ‘अब यो अवस्थामा घर छाडेका साथीहरू कांग्रेसमा फर्किनुस्। अन्य पार्टीमा जोडिएकाहरू पनि आउनुस्, हामी स्वागत गर्छौँ,’ चालिसेले भने।