रुकुम पूर्व – नेकपा (माओवादी केन्द्र) का संयोजक पुष्पकमल दाहाल ‘प्रचण्ड’ ले आगामी निर्वाचनलाई तीन प्रवृत्तिबीचको जनमत संग्रहका रूपमा चित्रण गरेका छन् । उनले भदौ २३ र २४ गतेका घटनालाई गम्भीर रूपमा लिनुपर्ने भन्दै ‘देश जलाउने र हिंसा–दमन गर्ने दुवै प्रवृत्तिविरुद्ध सशक्त अभियान आवश्यक’ भएको बताए ।

मंगलबार रुकुम पूर्वको नायगाड–देउखोलाबाट करिब एक घण्टाको पैदल यात्रापछि सिस्ने गाउँपालिका–२ नायगाड हुँदै सदरमुकाम रुकुमकोट पुगेका प्रचण्डले पत्रकार सम्मेलनमा आफ्ना अनुभव र राजनीतिक धारणा प्रस्तुत गरे । उनले भुमे र पुथा उत्तरगंगा गाउँपालिकाका सबै वडासहित दुर्गम बस्तीहरूमा दुई–तीन दिनमा कठिन अभियान सम्पन्न गरेको बताए ।

भदौ २३–२४ का घटनाप्रति प्रचण्डको धारणा

प्रचण्डले भदौ २३ साँझ भएको नरसंहार र २४ गतेको आगजनी तथा विध्वंसका घटनालाई गम्भीर रूपमा लिनुपर्ने बताए । “२३ गते साँझ नपुग्दै भएको नरसंहारको हामीले तत्काल विरोध गरेका थियौं । त्यसअघि पनि सरकारका नेतृत्वले गरेका कामको हामीले विरोध गर्दै आएका थियौं,” उनले भने ।

उनले सम्बन्धित पक्षले आत्मसमिक्षा गर्नुपर्नेमा ‘गल्ती भएको छैन’ भन्ने प्रवृत्ति देखिनु खतरनाक संकेत भएको जिकिर गरे । “गल्ती स्वीकार नगर्ने प्रवृत्ति देखिएको छ । यदि जनताले यसलाई बुझेन भने भविष्यमा फेरि दोहोरिन सक्छ,” उनले चेतावनी दिए ।

२४ गते भएको आगजनी तथा विध्वंसमा वामपन्थी तथा लोकतान्त्रिक दलका घरमा आक्रमण भएको उल्लेख गर्दै उनले भने, “त्यो नेपाललाई नियन्त्रणमा राख्न चाहनेहरूको इसारामा चल्ने प्रवृत्ति हो ।”

प्रचण्डले २३ र २४ गतेका दुवै गलत प्रवृत्तिविरुद्ध आफ्नो पार्टी स्पष्ट रूपमा उभिएको बताए । “यी दुवै गलत प्रवृत्तिविरुद्ध हामी नेपाली जनतालाई सचेत गराइरहेका छौं । २३ र २४ गतेका घटना नहोस् र दोहोरिन नदिन हाम्रो पार्टी प्रतिबद्ध छ,” उनले भने ।

निर्वाचन : तीन प्रवृत्तिबीचको जनमत संग्रह

प्रचण्डले अहिले देशमा तीन प्रकारका प्रवृत्तिबीच संघर्ष चलिरहेको उल्लेख गरे । उनले भने, “देश जलाउने, हिंसा र दमन गर्ने प्रवृत्ति ; युवालाई बलिको बोका बनाएर सत्तारोहण गर्ने प्रवृत्ति ; र राष्ट्रवाद, सुशासन, सामाजिक न्याय र समृद्धिको पक्षमा उभिने प्रवृत्ति ।”

उनले यो अवस्थालाई जनमत संग्रह जस्तो भएको बताउँदै भने, “जनताले अब फैसला गर्नुपर्छ । सुशासन, सामाजिक न्याय, समृद्धि र राष्ट्रियताको पक्षमा उभिन जरुरी छ । देशको पक्षमा काम गर्न सकिएन भने फेरि दुर्घटनामा पर्न सक्छ ।”

प्रचण्डले आफू देश दुर्घटनामा नजाओस् र समाजवादको यात्रामा अघि बढोस् भन्ने संकल्पका साथ अघि बढिरहेको दोहोर्‍याए ।

निष्पक्ष निर्वाचनमा नेकपा पहिलो हुने दाबी

प्रचण्डले निर्वाचनमा ‘फिक्सिङ’ को चर्चा अस्वीकार गरे । “देशभरबाट प्राप्त रिपोर्टअनुसार निष्पक्ष निर्वाचन भयो भने नेपाली कम्युनिस्ट पार्टी पहिलो बन्छ । देश र जनताको पक्षमा काम गर्ने पार्टी नेपाली कम्युनिस्ट पार्टी नै हो,” उनले दाबी गरे ।

मतदाताको माग र प्रतिबद्धता

प्रचण्डले रुकुम पूर्वका विभिन्न स्थानमा मतदाताले विकास निर्माण, शिक्षा, स्वास्थ्य, रोजगारी र पर्यटनमा जोड दिएको बताए । “सडक सञ्जाल विस्तार, अधुरा बाटो सम्पन्न, क्रमागत योजना पूरा र पुल निर्माण गर्नुपर्ने माग आएको छ,” उनले भने ।

उनले प्राप्त ज्ञापनपत्रलाई वर्गीकरण गरी पाँच वर्षभित्र गुणात्मक काम गर्ने प्रतिबद्धता गरे ।

प्रचण्डको यो अभिव्यक्ति जेनजी आन्दोलनपछि राजनीतिक विभाजन र तीन प्रवृत्तिबीचको संघर्षलाई स्पष्ट रूपमा प्रस्तुत गरेको छ । उनले ‘देश जलाउने र हिंसा–दमन गर्ने’ दुवै प्रवृत्तिविरुद्ध आफ्नो पार्टी उभिएको दोहोर्‍याएका छन् ।

फागुन २१ को निर्वाचन नजिकिँदै गर्दा प्रचण्डको यो अभिव्यक्तिले मतदातामा कस्तो प्रभाव पार्छ, त्यो हेर्न बाँकी छ । तर उनले रुकुम पूर्वलाई ‘समाजवादको नयाँ यात्राको सुरुवात’ का रूपमा प्रस्तुत गरेका छन् ।