गोरखा । चुमनुब्री गाउँपालिकाको वडा नम्बर २ लोकी एकल महिला पेमा लामा गाउँ नै छाडेर हिड्न बाध्य भएकी छन् । गत शनिवार गाउँमा कुटिएपछि पेमा सुरक्षा खोज्दै एकघण्टाभन्दा बढीटाढा हिडेर ली गाउँमा आश्रय लिन पुगेकी छन् । लीमा उनको बहिनीको घर छ ।

शनिवार आमा कुटिएपछि गाउँमा सुरक्षा नभएको र धाकधम्की बारम्बार आउन थालेपछि आमाले गाउँ छाडेको कर्मा नोर्साङ लामाले बताए । कर्मा पेमाका छोरा हुन् । उनले भने, “आमा ली भन्ने गाउँमा गएर बस्नुभएको छ ।”

पेमाका श्रीमान कोरानाका बेला बितेका थिए । उनी एकल महिला हुन् ।

गाउँबासीले कानुन विपरित जरिवाना गरेकी पेमामाथि शनिवार खुर्पा प्रहार भएको थियो । ४८ वर्षीया पेमालाई गाउँलेको गरेको निर्णयविपरित जिल्ला प्रशासन कार्यालय गोरखामा उजुरी दिएको भन्दै शनिवार आक्रमण भएको थियो ।

पेमालाई गाउँकै एक महिलामाथि विभिन्न झुटो आरोप लगाएको भन्दै २०७८ माघ २१ गते ६ लाखदेखि १० लाखसम्म तिराउने स्थानीयले निर्णय गरेका थिए । उनको असहमतिबीच पनि दबाब र धम्की दिएपछि पाँच लाख तिरेकी थिइन् ।

कानुन विपरित तिराएको पाँच लाख तिरेपछि पनि स्थानीयले झुठा आरोप र लान्छना लगाउन नछोडेपछि आफन्त र शुभचिन्तकको सल्लाहमा पेमाले जिल्ला प्रशासन कार्यालय गोरखामा उजुरी दिइकी थिइन् ।

दुई महिना अगाडि उजुरी गरेपनि हालसम्म न्याय पाउन नसकेको र उल्टै गाउँका अगुवाहरुबाटै डर र धम्की खेप्नुपरिरहेको गुनासो उनको छ ।

जिल्ला प्रशासन कार्यालयले यसबारे दुबै पक्षलाई राखेर छलफल गरी कानुनी कारबाहीमा जाने वा सहमतिमा विषय टुङ्गाउने भन्ने निर्णय गर्ने आश्वासन दिएको थियो ।

तर, पेमाले गाउँ नै छाडेर हिड्नुपर्ने स्थिति आउँदासमेत उनले न्याय पाउन सकेका छैनन् । गाउँलेले पाँच लाख नगद फिर्ता र माफी नमागे पीडितले किटानी जाहेरी दिने तयारी गरेका छन् ।

चुमनुब्री गाउँपालिकाका अध्यक्ष निमा लामाले भने दुवै पक्षलाई राखेर मिलाउने र नगद फिर्ता गर्ने विषयमा छलफल भइरहेको बताए ।