चितवन , २२ चैत । चितवनको रत्ननगरको एक कुखुरा फर्ममा ३ हजार ७ सय कुखुरा मरेको छ । रत्ननगर १५ माधवपुरमा रहेको लामिछाने पोल्ट्री फर्ममा रहेको लेयर्स कुखुराहरु एक हप्तायता मर्न थालेको हो ।

४ वटा खोरमा रहेको कुखुरा अचानक मर्न थालेपछि बर्ड फ्लूको आशंका समेत गरिएको छ । कुखुरा धमाधम मरेकाले बर्ड फ्लूको आशंका गरिएको लामिछाने पोल्ट्री फर्मका सञ्चालक अमृत लामिछानेले बताए ।

पंक्षी रोग अन्वेषण प्रयोगशालामा गराइएको प्रारम्भीक जाँजको रिपोर्टमा ‘एआइभी पोजिटिभ’ देखिएको थियो । प्रारम्भीक रिपोर्टमा इन्फ्लुइन्जा देखिएको तर कुन प्रकृतीको हो भन्ने अझै नखुलेको जिल्ला पशु सेवा कार्यालयका पशु चिकित्सक डा.विकाश श्रेष्ठले जानकारी दिए ।

उनले थप अनुसन्धानको लागी स्याम्पल काठमाण्डौ पठाइएको र रिर्पोट आएपछि मात्रै रोगको एकिन हुने बताए । चैत्र १५ गते बेलुका हावाहुरी आएपछि साँझबाट कुखुरा मर्न सुरु गरेको संचालक द्रोणप्रसाद लामिछानेले बताए ।

५ हजार १ सय कुखुरा पालेका लामिछानेले अहिलेसम्म ३ हजार ७ सय ३ वटा कुखुरा मरेको र अन्य पनी मर्ने क्रममा रहेको बताए । अहिलेसम्म ४० लाख बढीको क्षती भएको लामिछाने परिवारले मरेको कुखुरालाई ठुलो खाल्डो खनी पुरिरहेको छन् ।