काठमाडौं, २२ चैत । नेपाली सेनाको भावी प्रधानसेनापतिका पीए र राष्ट्रिय अनुसन्धान विभागका एआईजीको श्रीमती भन्दै एक करोडभन्दा बढी ठग्ने चार जना पक्राउ परेका छन् ।

प्रहरी परिसर काठमाडौंको टोलीले बिहीबार काठमाडौंमा पत्रकार सम्मेलन गर्दे लमजुङ घर भई काठमाडौं तारकेश्वर बस्दै आएका मोहन दुरा, मनमैजु बस्ने पशुपति अधिकारी, तनहुँ व्यास बस्ने यमुना खड्का र वनस्थली बस्ने रमेश कुमाललाई पक्राउ गरेको जनाएको हो ।

उनीहरुले सेना, प्रहरी र राष्ट्रिय अनुसन्धानमा जागिर लगाइदिनेदेखि क्यानडा, अमेरिका, पोल्याण्ड पठाइदिने भन्दै विभिन्न व्यक्तिहरुसँग एक करोडभन्दा बढी ठगी गरेका थिए । काठमाडौंका एसएसपी विश्वराज पोखरेलले यो गिरोहले राष्ट्रिय अनुसन्धान विभागको सिपाहीमा भर्ना गर्ने भन्दै दुई लाख, शान्ति मिसनमा पठाउने भन्दै दुई लाख तथा सेनाको सेकेण्ड लेफ्टिनेन्ट बनाइदिने भन्दै सात लाख लिएको देखिएको बताउनुभयो ।

त्यस्तै प्रहरीले नक्कली विद्यार्थी परिचयपत्र, सेना तथा प्रहरीको डकुमेन्ट र विश्वविद्यालयका नक्कली सर्टिफिकेट बनाउने बनाउन कीर्तिपुर पाँगास्थित टर्कुमान महर्जनलाई पक्राउ गरेको छ । महर्जनले एक दिनमा ५० भन्दा बढी विभिन्न कलेजका खासगरी त्रिभुवन विश्वविद्यालयका परिचयपत्र बनाउँदै आएको प्रहरीले जनाएको छ । महर्जनले विद्यार्थी परिचयपत्रसँगै वृद्धावृद्धाको कार्ड, सेना–प्रहरीको कार्ड, शैक्षिक योग्यताको प्रमाणपत्रसमेत बनाउँदै आएको खुलेको काठमाडौंका एसएसपी पोखरेलले बताउनुभयो ।

सरकारी छापको दुरुपयोग गरेर विभिन्न कागजात बनाउँदै आएका महर्जनलाई अहिले सार्वजनीक अपराध ऐनअन्र्तगत मुद्दा चलाइएको प्रहरी परिसर काठमाडौंले जनाएको छ । त्यस्तै प्रहरीले मंगलबार नियन्त्रणमा लिईएको ना ६ ख ६३०२ को बस बाट थप तीस लाख बरावरको सामान फेला पारेको छ । यसअघि बिहीबार उक्त बसमा खानतलासि गर्दा फल्स बटमबाट रक्तचन्दन फेला पारेको थियो ।