काठमाडौं, १३ असोज । सरकारले जेनजी युवाको आन्दोलन दवाउन भूमिका खुलेको आरोप लागेका पूर्वप्रधानमन्त्री केपी शर्मा ओलीसहित ५ जनालाई विदेश भ्रमण जान रोक लगाएको छ।

सरकारले गत भदौ २३ र २४ गतेको घटना छानविन गर्न बनेको जाँचबुझ आयोगको सिफारिसमा सरकारले पूर्वप्रधानमन्त्री ओली, पूर्व गृहमन्त्री रमेश लेखक, तत्कालिन गृहसचिव गोकर्णमणि दुवाडी, राष्ट्रिय अनुसन्धान विभागका पूर्वप्रमुख हुतराज थापा र काठमाडौंका तत्कालिन प्रमुख जिल्ला अधिकारी छविलाल रिजालाको पासपोर्ट रोक्का राख्ने जनाएको हो । साथै उनीहरुलाई विदेश भ्रमण गर्नबाट रोक्ने निर्णय गरिएको छ । त्यस्तै, उनीहरुलाई अनुमति विना उपत्यका छाड्न पनि सरकारले प्रतिबन्ध लगाएको हो ।

सरकारले विशेष अदालतका पूर्वअध्यक्ष गौरीबहादुर कार्कीको संयोजकत्वमा जाँचबुझ आयोग बनाएको छ । आन्दोलन दमन गरेको आरोप लागेकाले उनीहरुलाई आवश्यक पर्दा बयानका लागि आयोगमा उपस्थित गराउन पर्ने भएकाले बाहिर जान रोक्नु पर्ने भएको आयोगले जनाएको हो । भदौ २३ गते जेनजी आन्दोलनका क्रममा सुरक्षा व्यवस्था फितलो बनाउन तत्कालिन प्रधानमन्त्री ओली र गृहमन्त्री लेखेकले सडकमा कम प्रहरी देखाउन भनेको स्रोतको दावी छ ।

सडकमा भीड नियन्त्रणका लागि खटिनुपर्ने प्रहरीलाई संसद भवन थुपारिएको थियो । आन्दोलन दमनको आदेश गर्ने प्रमुख जिल्ला अधिकारीसहितका पदाधिकारी र आन्दोलनले पार्ने प्रभावको बारेमा पूर्वानुमान गर्न नसक्ने गुप्तचर विभागका प्रमखुलाई पहिलो घेरामा राखेर अनुसनधान अगाडि बढाइएको हो । जेनजी आन्दोलनका बारेमा सुरक्षा निकायले पहिले नै गृह मन्त्रालयका पदाधिकारीहरुलाई जानकारी गराएको थियो ।

तर गृहसचिव, गृहमन्त्री र प्रधानमन्त्रीले बेवास्ता गरेको सुरक्षाकर्मीहरुको भनाइ छ । जेनजी आन्दोलनको पहिलो दिन १९ जनाको मृत्यु भएको थियो । सोही आन्दोलनमा परी हालसम्म ७५ जनाको मृत्युभएको छ । साथै सयौं घाइते आन्दोलनकारीको काठमाडौं उपत्यकासहितका विभिन्न अस्पतालमा उपचार जारी रहेको स्वास्थ्य तथा जनसंख्या मन्त्रालयले जनाएको हो ।