काठमाडौ १३ भदौ । प्रधानमन्त्री केपी शर्मा ओलीले भोलिदेखि १८ गतेसम्म हुने चीन भ्रमणबारे आज संसद्लाई जानकारी गराउनुभएको छ । प्रतिनिधिसभा बैठकलाई सम्बोधन गर्दै उहाँले आफ्नो चीन भ्रमणबारे जानकारी गराउनुभएको हो ।

यसअघि आजै बसेको मन्त्रिपरिषद् बैठकले प्रधानमन्त्री ओलीको चीन भ्रमण स्वीकृत गरेको थियो । चिनियाँ राष्ट्रपति सी जिनपिङको निमन्त्रणमा नेपाली प्रतिनिधिमण्डलको नेतृत्व गर्दै चीन जान लाग्नुभएका प्रधानमन्त्री ओलीले शाङ्घाई सहयोग सङ्गठन ९एससीओ० शिखर सम्मेलनमा भाग लिने कार्यक्रम छ ।

एससीओ सम्मेलन भदौ १५ र १६ गते उत्तरी चीनको तियान्जिनमा हुँदैछ । चिनियाँ राष्ट्रपति सीले उद्घाटन गर्ने सम्मेलनमा भारतीय प्रधानमन्त्री नरेन्द्र मोदीसहित अन्य देशका सरकार तथा राष्ट्रप्रमुखसमेत उपस्थित हुने कार्यक्रम छ ।

भ्रमणका क्रममा प्रधानमन्त्री ओलीले चीनका राष्ट्रपति सी जिनपिङ तथा उपराष्ट्रपति हान चङ्गसँग द्विपक्षीय भेटवार्ता गर्ने कार्यक्रम छ । प्रधानमन्त्री ओली बेइजिङमा जापानी अतिक्रमणविरुद्धको ८०औं वार्षिकोत्सव समारोहमा सहभागी हुनुहुनेछ ।

यो भ्रमणबाट नेपाल–चीन मैत्रीपूर्ण सम्बन्ध थप सुदृढ हुने र अन्तर्राष्ट्रिय मञ्चमा नेपालको अवधारणा र प्राथमिकता स्पष्ट रूपमा प्रस्तुत हुने प्रधानमन्त्रीले विश्वास व्यक्त गर्नुभएको छ ।