काठमाडौं, १२ भदौ । काठमाडौं उपत्यकासहित देशका धेरै ठाउँमा रातिदेखि वर्षा भैरहेको छ । हाल बागमती र गण्डकी प्रदेशको पहाडी भूभागका थोरै स्थान तथा कोशी, मधेस र लुम्बिनीको एक–दुई स्थानमा हल्कादेखि मध्यम वर्षा भइरहेको छ।

मौसम पूर्वानुमान महाशाखाले आज लुम्बिनी प्रदेशको तराईका साथै सुदूरपश्चिम र कर्णाली प्रदेशका केही स्थानमा भारी वर्षाको सम्भावना रहेको जनाएको छ।

महाशाखाका अनुसार हाल कोशी, मधेश र बागमती प्रदेशसहित देशका पहाडी भू(भागमा साधारण बदली र बाँकी स्थानमा आंशिक बदली छ।

दिउँसोको पूर्वानुमान
बागमती, गण्डकी, लुम्बिनी र सुदूरपश्चिम प्रदेशसहित देशका पहाडी भू-भागमा साधारणतया बदली रहनेछ। यी प्रदेशका केही स्थानमा तथा बाँकी भेगका थोरै स्थानमा मध्यम वर्षा हुने सम्भावना छ। साथै, लुम्बिनी प्रदेशको तराई र सुदूरपश्चिम तथा कर्णाली प्रदेशका पहाडी भू-भागका एक(दुई स्थानमा भारी वर्षा हुने अनुमान गरिएको छ।

रातिको पूर्वानुमान
महाशाखाले राति देशभर साधारणतया बदली रहने जनाउँदै पहाडी भू-भागका धेरै स्थान र बाँकी भेगका थोरै स्थानमा मध्यम वर्षाको सम्भावना रहेको उल्लेख गरेको छ। गण्डकी, कर्णाली र सुदूरपश्चिम प्रदेशका पहाडी भू-भागसँगै लुम्बिनी र कोशी प्रदेशको तराईका केही स्थानमा भारी वर्षा हुने पूर्वानुमान गरिएको छ।

महाशाखाले वर्षाका कारण पहिरो, बाढी तथा पानीको सतह बढ्ने जोखिम रहेकाले आवश्यक सतर्कता अपनाउन समेत आग्रह गरेको छ।