काठमाडौ ३० साउन । भारतले १५ अगस्टका दिन आज आफ्नो ७९ औं स्वतन्त्रता दिवस मनाउँदैछ । यस अवसरमा प्रधानमन्त्री नरेन्द्र मोदी लगातार १२ औं पटक लाल किल्लाबाट राष्ट्रिय झण्डा फहराउँदै ऐतिहासिक रेकर्ड कायम गर्नुहुनेछ ।

योसँगै उहाँ पूर्व प्रधानमन्त्री इन्दिरा गान्धीको लगातार ११ पटकको झण्डा फहराउने रेकर्ड तोड्नुहुनेछ । मोदी २०१४ मा पहिलो पटक प्रधानमन्त्री बनेपछि हरेक वर्ष स्वतन्त्रता दिवसमा लाल किल्लाबाट देशलाई सम्बोधन गर्दै आउनु भएको छ ।

सन् १९४७ अगस्ट १५ मा करिब दुई शताब्दी लामो ब्रिटिश उपनिवेशवादी शासनको अन्त्य गर्दै भारत स्वतन्त्र राष्ट्रको रूपमा उदाएको थियो ।

१८ औं शताब्दीको मध्यतिर इस्ट इन्डिया कम्पनीमार्फत शुरु भएको ब्रिटिश प्रभाव, पछि प्रत्यक्ष उपनिवेशमा रूपान्तरण हुँदै, राजनीतिक, आर्थिक र सांस्कृतिक क्षेत्रमा गहिरो प्रभाव पारेको थियो ।

स्वतन्त्रताको यात्रामा महात्मा गान्धीको अहिंसात्मक आन्दोलन, जवाहरलाल नेहरू, सरदार बल्लभभाई पटेल, सुभाषचन्द्र बोसलगायतका नेताहरूको योगदान निर्णायक रह्यो ।

स्वतन्त्रता प्राप्तिपछि भारतले लोकतान्त्रिक गणतन्त्रको बाटो समातेको थियो । तर स्वतन्त्रताको दिनसँगै विभाजनको पीडादायी इतिहास पनि जोडिएको छ, जसले भारत र पाकिस्तान दुई स्वतन्त्र देशको रूपमा जन्म दिएको थियो ।

विभाजनका क्रममा लाखौं मानिस विस्थापित भए र ठूलो जनधनको क्षति भयो । भारतको स्वतन्त्रता दिवस केवल एक ऐतिहासिक घटना मात्र नभई लोकतन्त्र, एकता र निरन्तर प्रगतिप्रतिको प्रतिबद्धताको प्रतीकका रूपमा मनाइन्छ ।