काठमाडौ १ साउन । सरकारले नेपालगन्ज औद्योगिक क्षेत्रमा ठाउँ मात्रै ओगटेका तीन उद्योगलाई हटाउने तयारी गरेको छ।

औद्योगिक क्षेत्र व्यवस्थापन लिमिटेड शाखा कार्यालय बाँकेले तीन उद्योगसँग भएको जगगा तथा भवन सम्झौता रद्द गर्ने तयारी गरेको हो।

तीन उद्योगहरुमा श्री अलनुर मेटल रोलिङ मिल्स, रोशन क्राफ्ट मेटल ई, श्री युरो ट्रेडिङ एन्ड ओभरसिज मेटल ई रहेका छन्। यी उद्योगमध्ये अलनुरले २०५५ मा तामा आल्मुनियमका भाँडा, रोशन क्राफ्ट र युरोले क्रमशः २०७० र २०७३ मा मेटलका भाँडा वर्तन उत्पादन गर्ने सम्झौता गरेका थिए।

अलनुरले औद्योगिक क्षेत्रमा ४०३ रोपनी, बाँकी दुईले क्रमशः १ र २ रोपनी जग्गा ओगटिरहेका छन्। अलनुरसँगको सम्झौताको म्याद सकिएको, बक्यौता रकम नबुझाएको र उद्योग पनि बन्द अवस्थामा रहेको औद्योगिक क्षेत्र व्यवस्थापन लिमिटेडले जनाएको छ।

त्यसैगरी रोशन क्राफ्टले पनि बक्यौता रकम बुझाएको छैन भने उद्योग बन्द अवस्थामा छ। अर्को युरो ट्रेडिङको अवस्था पनि उस्तै छ।

सोही कारण औद्योगिक क्षेत्रबाट तीनवटै उद्योग हटाउन लागिएको हो। यसका लाग औद्योगिक क्षेत्र व्यवस्थापन लिमिटेड शाखा कार्यालय बाँकेले तीनवटै उद्योगको नाममा ३५ दिने सूचना निकालेको छ।