काठमाडौ ३२ असार । रसुवाको स्याफ्रुबेँसी–रसुवागढी खण्डमा मर्मतको काम अन्तिम चरणमा पुगेको छ । गएको असार २३ गते नेपाल–चीन सीमामा पर्ने ल्हेन्दे खोला भोटेकोशी मा आएको बाढीले स्याफ्रुबेँसी–रसुवागढी सडक क्षतविक्षत बनाएको थियो ।

बाढीले स्याफ्रुबेँसी–रसुवागढी झन्डै १४ किलोमिटर सडकमार्गको धेरैजसो भाग प्रभावित भएको थियो । सडक विभागसहित अन्य निकायको सहयोग र सहकार्यमा सडक मर्मतको काम ९० प्रतिशत पूरा भएको सडक सुधार आयोजना प्रमुख खड्गलाल श्रेष्ठले जानकारी दिनुभयो ।

गल्छी–त्रिशूली–रसुवागढी सडक सुधार आयोजना, स्थानीयस्तरमा सञ्चालित केही जलविद्युत् आयोजना र पालिकाको सहयोग र सहकार्यमा काम भइरहेको रसुवाका सहायक प्रमुख जिल्ला अधिकारी द्रुवप्रसाद अधिकारीले जानकारी दिनुभयो ।

उहाँका अनुसार रसुवागढी मितेरी पुलपारि चिनियाँ भागमा ‘पार्किङ’ गरी राखेको ३० वटा नेपाली कन्टेनर बाढीका कारण डुबानमा परेकामा २६ वटालाई निकालेको र बाँकी चारवटा कन्टेनरलाई पनि निकाल्न चिनियाँ पक्षबाट काम भइरहेको छ ।

बाढीले मितेरी पुल बगाउँदा रसुवागढी–केरुङ जोड्ने प्रमुख व्यापारिक नाका बन्द छ । यो पुल तत्काल सञ्चालनबारे विकल्पसहित चिनियाँ पक्षसँग छलफल भइरहेको भौतिक पूर्वाधार तथा यातायात मन्त्रालयले जनाएको छ ।