काठमाडौ २३ असार । काठमाण्डौ उपत्यकामा थप एक सय स्मार्ट विद्युतीय बस सञ्चालानका लागि प्रधानमन्त्री तथा मन्त्रिपरिषद्को कार्यालयमा छलफल भएको छ । हिजो भएको छलफलमा साझा यातायातका तर्फबाट प्रमुख कार्यकारी अधिकृत भुपेन्द्र अर्यालले नेपाल सरकारको सहजीकरणबाट भविष्यमा उपलब्ध हुने विद्युतीय गाडी सञ्चालन र व्यवस्थापनका विविध आयाम माथि प्रस्तुतिकरण दिनुभयो ।

विद्युतीय गाडीको दिगो व्यवस्थापन र प्रयोगका सन्दर्भमा साझा यातायातलाई विद्युतीय गाडी सञ्चालनका लागि आवश्यक पूर्वाधार निर्माणका लागि जग्गा व्यवस्थापन मुख्य समस्या रहेको छ । छलफलका क्रममा नयाँ विद्युतीय बसहरु सञ्चालनका लागि आवश्यक पार्किङ तथा होल्डिङ सेन्टर, चार्जिङ स्टेशन, मर्मत केन्द्र तथा स्पेयर्स पार्टस्लगायतका विषयमा चर्चा भएको प्रधानमन्त्री केपी शर्मा ओलीका निजी सचिव विनोदबहादुर कुँवरले जानकारी दिनुुभयो ।

साझा यातायातलाई आवश्यक जग्गाको खोजी र आवश्यक सहजीकरणका लागि प्रधानमन्त्री कार्यालयका सचिव राजकुमार श्रेष्ठ, सहसचिव नमराज घिमिरेलाई अन्तरनिकाय सहजीकरण र जग्गा यकिन गर्न काम गर्ने गरी तोक्ने निर्णय गरेको छ ।

उपत्यकाभित्र प्राप्त हुन सक्ने विभिन्न ठाउँका जग्गाका विषयमा व्यापक छलफल गरेको बैठकले त्यस्तो जग्गा प्राप्तिका लागि सम्बन्धित निकायसँग आवश्यक सहजीकरण गर्न सचिव श्रेष्ठलाई जिम्मेवारी दिइएको छ । काठमाण्डौ उपत्यकाको बढ्दो गाडीको चापलाई न्यूनीकरण गर्ने तथा विकसित शहरी यातायात प्रणालीसमेत अवलम्बन गर्ने मुख्य ध्येयसहित सरकारले केही महिनाभित्रै एक सयवटा ठूला यात्रवाहक बस सञ्चालनको गृहकार्य गरेको हो ।