काठमाडौं, १८ चैत । सिन्डिकेटको माग गर्दै काभ्रेका पुराना बस समितिहरुले आइतबारदेखि बस सेवा रोकेका छन्। मयुर यातायातलाई बनेपासम्म रुट इजाजत दिएपछि त्यसको विरोधमा ११ पुराना यातायात समितिले सेवा रोकेका हुन्।
आइतबार काभ्रेका ग्रामिण क्षेत्रमा बसहरु सञ्चालनमा रोक लगाईएको छ । मयुर यातायातको इजाजत खारेज गर्नुपर्न उनीहरुको प्रमुख माग छ।
मयुर यातायातले चैत १ गतेदेखि बनेपासम्म २० वटा सुविधासम्पन्न बस सञ्चालन गर्दै आएको छ। उसले थप ८० वटा बस थप्ने तयारी गरेपछि पुराना व्यवसायी आन्दोलनमा उत्रिएका हुन्।
सिन्डिकेटको जोगाउन माग गर्दै सेवा नै रोकेकोमा सरकारले कारबाहीको तयारी गरेको छ।
‘मयुर यातायातको विरोधमा ११ वटा पुराना यातायात समितिहरुले बस सेवा रोकेका छन्’ काभ्रेका प्रमुख जिल्ला अधिकारी शिव प्रसाद सिंखडा भने,‘आज एक दिन हेरौं, एक पटक छलफलमा बोलाउँछौं, त्यसपछि पनि सेवा सुचारु भएन भने कानुन अनुसार अघि बढ्छौं।’
नेपालको अत्याबश्यक सेवा ऐन अनुसार अत्यावश्यक सेवामा रोक लगाउने अधिकार छैन । यातायात क्षेत्र अत्यावश्यक सेवामा पर्ने भएकोले सेवा संचालनमा नल्याए ऐन अनुसार उनीहरुको इजाजत रद्द गरी तत्काल कारबाही गर्ने अधिकार सिडिओसँग हुन्छ। प्रधानमन्त्री तथा मन्त्रीपरिषद् कार्यालयले सिन्डिकेटविरुद्ध कडा रुपमा कारबाही गर्न यस अघि नै निर्देशन दिइसकेको छ।
प्रतिक्रिया दिनुहोस्