काठमाडौ २० असार । जनमत पार्टीका अध्यक्ष डा। सिके राउतले उपाध्यक्षमा आफ्नै दाइ जयकान्त राउतलाई पार्टीको उपाध्यक्षमा मनोनयन गरेपछि पार्टीभित्र विवाद देखिएको छ।

गएको निर्वाचनबाट मधेशबाट नयाँ शक्तिको रूपमा उदाएको जनमत पार्टीमा अध्यक्ष राउतको कार्यशैलीलाई लिएर एकपछि अर्को विवाद देखिएको हो।

राउतले मङ्गलवार दाइ जयकान्त र दानबहादुर चौधरीलाई उपाध्यक्षमा मनोनीत गरेका थिए। नयाँ पार्टीमा पुरानो झैँ गरेर परिवारवाद हाबी भएको भन्दै पार्टीका नेता कार्यकर्ता अध्यक्ष राउतको यो निर्णयबाट रुष्ट सुनिन्छन्।

पार्टीको कारबाहीमा परेका उपाध्यक्ष दीपक साहले एक प्रेस विज्ञप्ति जारी गर्दै जनमत पार्टीले राष्ट्रिय उपाध्यक्ष पदमा मनोनीत गर्ने निर्णयको विरोध गरेका छन्।

उनले विशेषतः पार्टी अध्यक्षद्वारा आफ्ना पारिवारिक सदस्यहरूलाई योजनाबद्ध रूपमा नेतृत्वमा उकास्ने प्रवृत्तिले संस्थागत राजनीतिलाई गम्भीर रूपले क्षति पुर्‍याएको आरोप लगाएका छन्।

साहद्वारा जारी विज्ञप्तिमा भनिएको छ, ‘२०७७ सालमा श्रीमती बबिता कुमारी राउतलाई उपाध्यक्ष पदमा मनोनयन गरी प्रदेश सभाको उपसभामुख बनाउने निर्णयले सुरु भएको पारिवारिक प्राथमिकताको क्रम अहिले पुनः अध्यक्षज्यूका दाजु डा। जयकान्त राउतलाई राष्ट्रिय उपाध्यक्ष बनाइएसँगै झन् प्रस्ट भएको छ। विगतमा उहाँलाई सांसदको उम्मेदवार, योजना आयोगको सदस्य, राष्ट्रिय परिषद्को अध्यक्ष, र सङ्गठन विभागको प्रमुखजस्ता पदहरूमा क्रमशः जिम्मेवारी दिइएको थियो । यसले सङ्गठनभित्र गहिरो असन्तुलन, पात्रको उपेक्षा र कार्यकर्ताको मनोबलमा गम्भीर असर पारिरहेको छ।’

अध्यक्ष डा। राउतले पार्टीका वरिष्ठ उपाध्यक्ष साहसहित कोषाध्यक्ष सुरेन्द्र यादव लगायतलाई कारबाही गरेका थिए। त्यसो त पछिल्लो समयमा अध्यक्ष राउतमाथि पार्टीभित्र आफ्नो विरोध गर्नेहरूमाथि कारबाहीको डन्डा बर्साउने गरेको आरोप छ। अध्यक्ष राउतको यो निर्णय मात्रै‌ नभई कार्यशैलीमाथि नै प्रश्न उठाएर नेताहरूले असन्तुष्टि पोख्ने गरेका छन्।

जनमतका प्रवक्ता डा। शरद यादवले भने अध्यक्षको दाइ मात्रै नभएर योगदानको आधारमा नै उपाध्यक्षमा पार्टीको मनोनीत गरेको दाबी गरे।

उनले नेपाल प्रेससँग भने, ‘उहाँहरूले नबुझेर विरोध गरिराख्नुभएको छ। स्वतन्त्र मधेसको आन्दोलनबाट डाक्टर सावलाई मूलधारको राजनीतिमा ल्याउनेमै उहाँको दाइको हात छ। उहाँ जेल हुँदा होस् वा मुद्दा लाग्दा सबै उहाँकै दाइले नै हेर्नुहुन्थ्यो। उहाँको दाइ साइन्टीस पढेको मान्छे हुनुहुन्छ।’

उनले उपाध्यक्षमा मनोनीत भएका राउतले गएको चुनावमा सप्तरी १ बाट लडेर २१ हजार ३ सय भोट ल्याएको पनि स्मरण गरे।

उनले थपे, ‘पार्टीको हरेक सङ्गठनको काममा उहाँ खटिराख्नुभएको छ। उहाँ उपाध्यक्ष बन्नको लागि सबै मापदण्ड पुगेको छ। कसैको दाइ हो भन्दैमा उपाध्यक्ष बन्नै नपाउने भन्ने हुँदैन।’

उनले मातृका, बिपी र गिरिजाप्रसाद कोइराला एउटै आमाबुबाको सन्तान देशको प्रधानमन्त्री भएको स्मरण गरे।

प्रवक्ता यादवले थपे, ‘त्यसैले योग्यता र पार्टीभित्र योगदान छैन भन्ने बन्नु हुँदैन। तर उसको सङ्गठन बनाउने, चुनाव लड्ने क्षमता छ भने कसैको दाइ पदबाट बाहिर रहनुपर्छ भन्ने छैन।’

उनले निर्णयको विरोध गरेका साहलाई पार्टीले ६ महिनाको लागि कुनै जिम्मेवारीमा नरहने गरी निलम्बन गरेको बताए।