रौतहट, १४ चैत । खानेपानी तथा सरसफाई मन्त्री विना मगरले राष्ट्रको पहिचान सरसफाई र स्वच्छ खानेपानीसँग जोडिएको बताउनुभएको छ ।

रौतहटको कटहरिया नगरपालिकामा आयोजित कटहरिया साना सहरी खानेपानी तथा सरसफाई संस्थाको शिलान्यास गर्दै मन्त्री मगरले खानेपानी संविधानमा नै जनताको मौलिक हकको रुपमा समावेश भएको सरकारको प्राथमिकतामा भएको बताउनुभयो ।

राष्ट्र कस्तो छ भन्ने कुरा त्यहाँको वातावरण र समाजले प्रमाणि गर्ने भएकोले देशका सबै क्षेत्रमा स्वच्छ खानेपानीको कार्यक्रम अभियानका रुपमा अगाडि बढाउने उहाँको भनाई छ ।

मन्त्री मगरले मन्त्रालयले राष्ट्रलाई नयाँ दिशा दिने क्रममा स्वच्छ खानेपानीको आधारभूत भुमिका भन्दै तराईका २२ जिल्लामा सरसफाइ र स्वच्छ खानेपानीको कार्यक्रम सञ्चालन गर्ने बताउनुभयो ।

कार्यक्रममा माओवादी केन्द्रका नेता तथा पुर्व मन्त्री प्रभु साहले स्वच्छ खानेपानीमा जनताको सर्वसुलभ पहुँच अझै नपुगेको भन्दै अभियानै थाल्नु पर्ने बताउनुभयो ।

नेता साहले स्थानीय तहको विकासमा खानेपानी, सडक सञ्जाल, आधुनिक प्रविधिमा आधारित खेती प्रणालीले मात्र जीवन स्तर सुधार गर्ने भन्दै सरकारको ध्यानकर्षण गराउनुभयो ।

कार्यक्रममा सहभागी वक्ताहरुले हिमाली र पहाडी क्षेत्रमा पनि स्वच्छ वातावरण बनाउने कार्यक्रमलाई अभियानका रुपमा सञ्चालन गर्नुपर्ने धारणा राखेका थिए । रौतहटको मौलापुर नगरपालिकालाई खुल्ला दिशामुक्त क्षेत्र घोषणा समेत गरिएको हो ।