काठमाडौ २३ जेठ । अमेरिकी राष्ट्रपति डोनाल्ड ट्रम्प र अर्बपति एलोन मस्कबीचको तनाव उत्कर्षमा पुगेको छ । योसँगै विश्वको सबैभन्दा शक्तिशाली नेता र धनाढ्य व्यक्तिबीचको यसअघिको मित्रता समाप्त भएको बीबीसीले जनाएको छ ।

मस्कले राष्ट्रपति ट्रम्पले हस्ताक्षर गर्नुभएको खर्च तथा बिलसम्बन्धी कानूनविरुद्ध सक्रिय रूपमा एक हप्ताभन्दा बढी समयदेखि पैरवी गरिरहनुभएको छ । योबीचमा हिजो ट्रम्पले जर्मन चान्सलरसँगको भेटमा मस्कसँगको आफ्नो निराशा बारे स्पष्ट पार्नुभएको खबरमा उल्लेख छ ।

ट्रम्प र मस्कबीचको टकरावका कारण ट्रम्प प्रसाशनले मस्कका कम्पनीहरूसँगको सरकारी सम्झौताहरू कटौती गर्ने चेतावनी पनि दिइइरहेको छ । यही तनावकाबीच मस्कको कम्पनी टेस्लाको स्टक मूल्य १४ प्रतिशतले घटेको छ ।

गएको हप्ता मस्कले आधिकारिक रूपमा आफ्नो सरकारी पद छोडेपछि उहाँहरुबीच विवाद शुरु भएको हो । उहाँ ट्रम्प प्रशासनको डिपार्टमेन्ट अफ गभर्नमेन्ट एफिशिएन्सी डीओजीआई अर्थात खर्च कटौती विभागमा झन्डै साढे ४ महिना काम गरेपछि अघिल्लो हप्ता बाहिरिनुभएको थियो ।