काठमाडौं, १४ चैत्र । नवलपरासीमा भएको दुर्घटनामा परी तीन जनाको मृत्यु भएको छ । १५ जना घाइते भएका छन् । आज(शनिबार) बिहान १ बजे नवलपरासीको बर्दघाट नगरपालिका–४ घ्यूखोलामा तीनवटा सवारी साधन एक आपसमा ठोकिँदा सो दुर्घटना भएको जिल्ला प्रहरी कार्यालयका सूचना अधिकारी डिएसपी विरदत्त पन्तले जानकारी दिए ।

पूर्वबाट पश्चिम(बुटवलतर्फ) जाँदै गरेको ना ७ ख ९३९८ नम्बरको ट्रक र सोही दिशाबाट जाँदै गरेका लु २ ख २३५१ को बसले सोही दिशाबाट जाँदै गरेको ना ५ ख २२७५ को पिकअप गाडी दुर्घटनामा परेको हो ।

ट्रक र बसले पिअपलाई ठक्कर दिएको थियो । ठक्कर दिएका बस र ट्रक २ सय मिटर तल खस्दा दुर्घटना भएको डिएसपी पन्तले जानकारी दिए ।

दुर्घटनामा परी रोल्पा बागमाराका २५ वर्षका गोबिन बुढा, र पहिचान नखुलेका २५र२६ वर्षका दुई पुरुषको मृत्यु भएको छ । उनीहरुको शव पृथ्वीचन्द्र अस्पताल परासीमा राखिएको छ । त्यसैगरी घाइते हुनेमा बसका चालक रोल्पा माडी बस्ने २४ वर्षिय हिमाल घर्ती, सोही ठाउँका १९ वर्षका किरण पुन, रोल्पा परिवर्तन–४ बस्ने मरिचमान घर्ती घाइते भएका छन् । त्यसैगरी सोही ठाउँ बस्ने ४८ वर्षका सुशिला नेपाली, वर्ष ५८ का मोतिलाल डाँगी, वर्ष ६२ का झुपबहादुर घर्ती र वर्ष ६२ का तीर्थबहादुर पुन छन् ।
त्यस्तै घाइते हुने अन्यमा ट्रक चालक बर्दिया बारबर्दिया नगरपालिका–७ का २४ वर्षका सागर चौधरी, सोही ठाउँका १९ वर्षका जीवन चौधरी, कञ्चनपुर कृष्णपुर गाउँपालिका–६ का २८ वर्षका लोकराज ओझा, काठमाण्डौंका २८ वर्षका लक्ष्मी खत्री, दाङ घोराही–३ का ४९ वर्षका खिमबहादुर नेपाली र एक पहिचान नखुलेकी अन्दाजी २५ वर्षकी महिला रहेकी प्रहरील जनाएको छ । मध्यम अवस्थामा रहेका उनीहरु सबैको बुटवल सिटी अस्पतालमा उपचार भइरहेको छ । त्यसैगरी चितवन इच्छा मनकामना –१ का ३१ वर्षका विशाल चेपाङ् र पिकअप चालक चितवन रत्ननगरका वर्ष २९ का आशिष गुरुङ् घाइते भएका छन् । सामान्य अवस्थामा रहेका उनीहरुको चिसापानी अस्पताल बर्दघाटमा उपचार भइरहेको प्रहरीले जनाएको छ ।