काठमाडौं, १२ चैत । नेपाली काँग्रेस निकट भातृसंगठन नेवि संघका कार्यकर्ता शिक्षा एेन नवौं संसोधनको खारेजी र अस्थायी शिक्षकको चैत्र २३ मा हुने परीक्षा स्थगित गर्न माग गर्दै आमरण अनशनमा बसेका छन् ।

नेविसंघका कार्यकर्ता राजन लम्साल, मिलन बास्तोला, हेमराज थापा, सुशान्त बोहरा र रामचन्द्र कार्कीले काठमाडौंको माइतीघरमा सोमबारदेखि आमरण अनसन सुरु गरेका छन् ।

उनीहरुले ‘झोले शिक्षक मुर्दाबाद’, ‘युवाहरुलाई अवसर देउ’ लगायतका प्लेकार्ड बोक्दै चर्का नारा समेत लगाएका थिए ।

नेविसंघ महामन्त्री कुन्दनराज काफ्लेले स्थायी शिक्षकको माग पूरा गर्ने नाममा युवाहरुलाई प्रतिस्पर्धाबाट वञ्चित गरिएको आरोप लगाए ।

शिक्षित बेरोजगार बढिरहेको अवस्थामा खुकुलो प्रावधान सहित अस्थायी शिक्षक हरुलाई स्थायी गर्न लागिएकाले आफूहरुले खारेजीको माग गरेको उनले बताए ।

आगामी चैत्र २३ मा हुन लागेको परिक्षामा २२ हजार स्थायी दरबन्दीका लागि २३ हजारले प्रतिस्पर्धा गर्दैछन्। अस्थायी शिक्षकको लागि उत्तीर्ण हुन पूर्णाङ्कको ४० प्रतिशत अंक ल्याए हुने प्रावधान रहेको छ।