काठमाडौं, १२ चैत । सोमबार बसेको मन्त्रीपरिषद् बैठकले विविध विषयहरुको निर्णय गरेको छ । सरकारले संघीय संरचनाअनुसार कुटनीतिक राहदानी दिने व्यवस्था देखि राष्ट्रपतिको सम्बोधनको कार्यक्रम पनि तय गरेको छ ।

सोमबार बसेको मन्त्रिपरिषद् बैठकले संघीय संरचनाअनुसार प्रदेश सरकार, प्रदेशसभा र जिल्ला समन्वय समितिका संयोजकसम्मलाई कूटनीतिक राहदानी दिने निर्णय गरेको छ ।

आज भएको निर्णय अनुसार गाउँपालिका अध्यक्षले विशेष राहदानी पाउने छन् ।

यस्तै मन्त्रिपरिषद्को बैठकले अबदेखि घर बहालबापतको दोहोरो कर नलिने निर्णय गरेको छ ।

बर्दियाको रानीजमरा सिंचाई आयोजनाबाट प्रभावितहरुलाई क्षतिपुर्ति दिने, निर्वाचनका क्रममा बम विष्फोटनमा घाइते भएका तथा बलात्कार भएकाहरुको बिलका आधारमा सरकारले खर्च व्यहोर्ने निर्णय पनि बैठकले गरेको सञ्चार तथा सूचना राज्यमन्त्री गोकुल बास्कोटाले जानकारी दिए ।

त्यस्तै सरकारले रक्षा मन्त्रालयका १३ जना महासनेनानीको २ वर्षको म्याद थपेको छ । यसैगरी मन्त्रिपरिषदले प्रधानमन्त्रीको जनसम्पर्क सल्लाहकारमा बाराका अच्युत मैनालीलाई नियुक्त गरेको छ भने प्रेस सल्लाहकारमा डा कुन्दन अर्याललाई नियुक्त गरेको छ ।

मन्त्रिपरिषदको निर्णयअनुसार आगामी चैत्र १५ गते राष्ट्रपतिले संघीय संसदलाई सम्बोधन गर्ने कार्यक्रम पनि सरकारले तय गरेको छ ।