काठमाडौ ४ जेठ । अध्यक्ष प्रचण्डले सहिद तथा बेपत्ता परिवारको अपनत्व राज्यले नै लिने गरी शान्तिप्रकृया टुंग्याउनुपर्ने उल्लेख गर्दै सत्य निरूपण तथा बेपत्ता व्यक्तिहरू सम्बन्धी विधेयक दुवै सदनबाट पारित भई आयोग गठन भइसकेको जानकारी दिनुभयो। उहाँले सो आयोगले कामलाई पूर्णता दिएपछि पीडित परिवारलाई राज्यबाट प्रमाणपत्र वितरण, सार्वजनिक सेवामा समावेशीकरण र परिपूर्ति सुनिश्चित गर्ने प्रक्रियामा अघि बढ्ने बताउनुभयो।

दैलेखमा संगठन विस्तार, जनतामा राजनीतिक प्रभाव राम्रो रहेको उहाँले बताउनुभयो ।अब दैलेखमा निर्वाचन जित्ने सम्भावना प्रबल रहेको उल्लेख गर्दै अध्यक्ष प्रचण्डले भित्री गुटबन्दी र आन्तरिक अन्तरविरोध हल गरेर अघि बढ्न निर्देशन दिनुभयो । ूयस अघिको निर्वाचनमा ६० जति पालिकामा जित सुनिश्चित हुने अवस्थामा समेत गुटबन्दीका कारण हामी पछि पर्यौं,” उहाँले भन्नुभयो।

उहाँले पार्टीभित्र स्वस्थ बहस र छलफलको संस्कृति विकास गर्नुपर्ने आवश्यकता औंल्याउँदै “स्वार्थ समूहको प्रभावमा पार्टीलाई अधोगतितर्फ लैजान नदिई संगठनलाई लेनिनवादी सिद्धान्तअनुसार अगाडि बढाउनुपर्ने” धारणा व्यक्त गर्नुभयो।

अध्यक्ष प्रचण्डले पार्टीभित्र सबैका मतप्रति सम्मानसहित पार्टी भित्र एकमत कायम गर्दै एकताकालागि आफूहरू लगातार प्रयत्नशील रहेको र पार्टीले समग्र रूपमा देशको नेतृत्व गर्न सक्षम संगठन निर्माणमा ध्यान केन्द्रित गरिरहेको जानकारी दिनुभयो।