काठमाडौ २८ बैशाख । डा।गुणाकर भट्टलाई नेपाल राष्ट्र बैंकको गभर्नर बनाउने प्रयास पेचिलो बनेपछि नेपाली कांग्रेसले अर्थविद् डाक्टर विश्व पौडेललाई नयाँ गनर्नरमा अगाडि सार्ने तयारी गरेको छ।

शनिबार बेलुका बालुवाटारमा प्रधानमन्त्री केपी शर्मा ओलीसँगको भेटमा कांग्रेस सभापति शेरबहादुर देउवाले यदि भट्टलाई गभर्नर बनाउन नसकिने भए पौडेललाई बनाउन प्रधानमन्त्री ओलीसमक्ष प्रस्ताव गरेका हुन्।

कांग्रेस मुख्यसचिव कृष्णप्रसाद पौडेलले पनि त्यसको पुष्टि गरे।

‘भट्टजीलाई गभर्नर बनाउन नसकिएपछि सभापतिले नयाँ नाम दिनु परेको हो,’ उनले भने, ‘विश्व पौडेलको नाम अहिले सभापति ज्यूले अगाडि सार्नु भएको साँचो हो।’

तर, पौडेल अहिले सरकारले गठन गरेको गभर्नर सिफारिस समितिका सदस्य छन्। अर्थमन्त्री विष्णु पौडेल संयोजकत्वको सो समिति छोडेपछि मात्रै उनको विषयमा छलफल हुन सक्छ।

कांग्रसले भट्टलाई नयाँ गभर्नर बनाउन जोडबल गर्दै आएको छ। तर, उनको राजीनामा स्वीकृत नभएकाले लामो समयदेखि राष्ट्र बैंकको गभर्नर सिफरिस हुन सकेको छैन।

कांग्रस निकट स्रोतका अनुसार विश्व पौडेल योग्यताको हिसाबले पनि गभर्नर पदका लागि सक्षम व्यक्ति हुन्। यसमा विश्वको पनि चाहना देखिन्छ।

अब एक चरण देउवा र ओली बसेर विश्वलाई सिफारिस समितिको सदस्यबाट राजीनामा गर्न लगाएर अर्को व्यक्तिलाई सिफारिस समितिमा ल्याउने सम्मको तयारी र छलफल उनीहरुबीच भएको स्रोतले जनाएको छ।