चितवन, ९ चैत। नारायणगढ मुग्लिङ्ग सडक खण्ड अन्तर्गत २ नम्बर पुल नजिक ढुङ्गा खसेर लाग्दा एक जनाको मृत्यु भएको छ । चितवनको इच्छाकामना गाँउपालिका ६ मा माथीबाट खसेको ढुङ्गाले लागेर आज अपरान्ह्र माइक्रो बसको चालकको मृत्यु भएको हो ।

काठमाण्डौबाट नारायणगढ तर्फ आउदै गरेको बा २ ख ५४४९ नम्बरको माइक्रो बसमा ढुङ्गा खसेको प्रहरीले जनाएको छ । दुर्घटनामा परी माइक्रो बसका चालक मकवानपुर जिल्ला दामन ६ बस्ने बर्ष २८ को दिपक रुम्बाको मृत्यु भएको जिल्ला प्रहरी कार्यालय चितवनका प्रवक्ता प्रहरी नायव उपरिक्षक प्रभु ढकालले जानकारी दिए ।

सडक बिस्तारको काम चलिरहेको नारायणगढ मुग्लिङ्ग सडकको माथीको डाडामा डढेलो लागेको छ । सोही डढेलोको कारण ढुङ्गा खसेर दुर्घटना भएको नारायणगढ मुग्लिङ्ग सडक आयोजनाका सुचना अधिकारी इन्जिनियर शिव खनालले बताए । माथीको डाडामा डढेलो लागेकोले अझै ढुङ्गा खस्न सक्ने भन्दै सावधानी पुर्वक यात्रा गर्न खनालले अनुरोध समेत गरेका छन् ।