फागुन २८ गते सोमबार बंगलादेशको यूएस बंगला एअरलाइन्सको विमान दुर्घट्नामा ज्यान गुमाएका सर्लाही कविलासीका अवधेसकुमार यादवको परिवारलाई आर्थिक सहयोग गरिएको छ । समाजसेवी उज्वल विक्रम थापाको नेतृत्वमा संकलन भएको एक लाख ९६ हजार रुपैँया बिहिवार मृतकका परिवारलाई हस्तान्तरण गरिएको हो । आर्थिक अवस्था दयनीय रहेका अवधेसको परिवारलाई उनी विदेश जाँदा लागेको ऋण समेत तिर्न समस्या रहेको अवस्था थाहा पाएपछि आफूले सामाजिक सञ्जाल मार्फत रकम संकलनगरी हस्तान्तरण गरेको समाजसेवी थापाले बताए ।

‘काठमाडौँमा छोराको शव बुझ्न जाँदा मृतकका बृवा आमालाई भेटेको थिए’, समाजसेवी थापाले भने, ‘आर्थिक अवस्था निकै दयनीय रहेछ, मैले त्यतिबेलानै उनीहरुलाई घर फर्किन यातायात खर्च बापत ११ हजार रुपैँया दिएको थिए । त्यसबेला भनेको थिए, म तपाईँहरुको ऋण तिर्न पुग्ने रकम संकलन गरेर गाउँमै लिएर आउँछु, त्यही वाचा अनुसार मृतकका परिवारलाई गाउँमै आएर पैँसा दिएका हौँ । ’

कविलासी नगरपालिका–३, साबिक जमुनियाँ गाविस– १ बीरनगराका २१ वर्षका अवधेस गत असोज २४ गते वैदेशिक रोजगारका लागि कतार जान घरबाट हिँडेका थिए । विदेश गएको ६ महिना नपुग्दै बिरामी परेपछि स्वदेश फर्किएका अवधेसको फागुन २८ गते सोमवार त्रिभुवन अन्तर्राष्ट्रिय विमानस्थल काठमाडौँमा भएको विमान दुर्घटनामा ज्यान गएको थियो । घरमा गर्भवती श्रीमतीलाई छाडेर गएका अवधेसको परिवारमा अहिले बुवा राशनारायण, आमा सुमित्रा देवी, श्रीमती पुनम र ५ महिनाकी छोरी छिन् ।

दुःखको घडीमा सहयोग पाउँदा भगवान पाएजस्तै भएको मृतक अवधेसका बुवा राशनारायणले बताए । मुर्तीमा भगवान हुन्छ भन्थे, तर भगवान त हिँडेरै आउँदा रैछन्, राजनारायणले भने, ‘सहयोगीहरु त महा भगवाननै रैछन् । ’ उनले भने, ‘सहयोग नपाएको भए घरजग्गानै बेचेर ऋण रकम तिर्नुपर्ने अवस्था रहेको थियो । ’

सहयोगी दाताहरुकै उपस्थितीमा अवधेसका बुवा राशनारायण यादवले छोरा विदेश पठाउँदा र बिरामी हुँदा उपचार गर्न लिएको एक लाख ४५ हजार रुपैँया ऋण समेत तिर्नु भएको छ । ऋण दिने दाताहरुले मृतकको परिवारसँग साँहु रकममात्रै लिएका छन् । सहयोग रकम लिएर गाउँमा पुगेका युवाहरुसँगै राजपा नेपाल सर्लाहीका अध्यक्ष नागेश्वर साह र स्थानीय रामदरेश रायले पनि २ हजार ५ सय ५ रुपैँया आर्थिक सहयोग गरेका छन् ।

त्रिभुवन अन्तर्राष्ट्रिय बिमानस्थल काठमाडौँमा अवतरण गर्नेक्रममा बंगलादेशको ढाकाबाट काठमाडौं आएको उडान नम्बर बिएस २११ यूएस बंगला एअरलाइन्सको विमानमा अचानक आगलागी हुँदा ४९ जनाको मृत्यु भएको थियो ।