काठमाडौं, ७ चैत । रुकुम(पश्चिम)को सानीभेरी गाउँपालीकाको कार्यालयमा २ दिन दिन देखि ताला लागेको छ । गाउँकार्यपालिकाले सानीभेरी गाउँपालिका ७ को द्धारेलाई गाउँपालिकाको केन्द्रका रुपमा छनौट गर्ने निर्णय गरेपछि यसको विरोधमा मंगलबार बिहान ४ वटा वडावासीहरुले गाउँपालिकाको कार्यालयमा तालाबन्दी गरेका हुन् ।

सानीभेरी गाउँपालिका वडा नं. ९ मा रहेको गाउँपालिकाको केन्द्र वडा नं. ७ को द्धारेमा सार्ने निर्णय भएपछि वडा नं. ८, ९, १० र ११ आन्दोलनमा उत्रिएका छन् । गाउँकार्यपालिकाको चैत्र ४ गते बसेको बैठकले जग्गा छनौट सम्बन्धीका यसअघिका सम्पुर्ण प्रक्रिया खारेज गर्ने र गाउँपालिकाको केन्द्र द्धारेलाई छनौट गर्ने निर्णय गरेको थियो ।

गाउँपालिकाको केन्द्र सार्ने निर्णय नसच्चिएसम्म आन्दोलनका कार्यक्रम जारी रहने आन्दोलन संघर्ष समितिका संयोजक एवं सानीभेरी ९ का वडाध्यक्ष शेरवहादुर खड्काले जानकारी दिनुभयो । गाउँपालिका अध्यक्ष नरवहादुर पुनले भने भौगोलिक रुपमा सबैको पायक पर्ने द्धारेमा गाउँपालिकाको केन्द्र सार्ने निर्णय गरिएको बताउनुभयो ।

उहाँका अनुसार भौगोलिक उपयुक्तता, अन्य विषयगत कार्यालयहरुको केन्द्रिकरण, कार्यपालिकाको बहुमत सदस्यको समर्थन प्राप्त स्थान तथा सामाजिक र मनोबैज्ञानिक रुपमा केन्द्रिकृत आकांक्षाका कारण गाउँपालिकाको लागि केन्द्र द्धारेमा सार्ने कार्यपालिकाले निर्णय गरेको हो ।

त्यस्तै गाउँपालिकाको केन्द्र सिम्लिमा हुने भनिएको र सिम्लीमै जग्गा खरिद गर्ने निर्णय भएकाले यसलाई ठुलो विषय नबनाउँन उहाँको आग्रह छ ।।