सर्लाही, ७ चैत्र ।  सुनचाँदी व्यवसायी सुनिल साहको हत्या गरी फरार रहेका मुख्य योजनाकार पासवान पक्राउ परेका छन् । सर्लाही लालबन्दी नगरपालिका २ पुर्नवास वस्ने ४५ वर्षिय राजु नाम गरेका उमेश पासवालाई प्रहरीले पक्राउ गरी विहिवार पत्रकार सम्मेलन मार्फत सार्वजनिक गरेको हो ।

पक्राउ परेका पासवान पिडारी बजारमा ‘जय माँ ‘सुनचाँदी पसलका संचालक सुनचाँदी व्यवसायी सुनिल साहको हत्याका मुख्य योजनाकार हुन् ।

उनी सहित बरहथवा न.पा. १६ बस्ने २३ वर्षिय कृष्ण साह, २५ वर्षिय प्रभु नारायण महतो, कविलासि न.पा. १ बस्ने २१ बर्षिय भोला भन्ने बिरेन्द्र महतोले गत असोज २४ गते  व्यवसायी सुनिल साहको गोली हानी हत्या गरेका थिए ।

पसल वन्द गरी आफ्नो बुवालाई मोटरसाईकलमा राखी घर तर्फ जाँदै गर्दा व्यवसायी सुनिल साहलाई गोली हानीएको थियो । साहको साथमा भएको ८ तोला सुन, ४ किलो चाँदी र नगद ४० हजार पनि लगिएको थियो ।

फरार मध्ये तीन जनालाई प्रहरीले यस अघि नै पक्राउ गरि सकेको थियो । मुख्य योजनाकार पासवानलाई भने विशेष सुराकीको आधारमा उनकै घरबाट केही दिन अघि पक्राउ गरि विहीवार सार्वजनिक गरिएको जिल्ला प्रहरी कार्यालय सर्लाहीका प्रहरी प्रमुख प्रहरी उपरीक्षक मोहम्मद मसाउद आलम खाँले बताए ।

अभियुक्त पासवान माथि जिल्ला अदालत सर्लाहीले खुनडाँका तथा संगठित अपराधको मुदा चलाईएको छ । त्यस्तै जिल्ला प्रशासन कार्यालय सिराहबाट हातहतियार र रुपन्देहीबाट कर्तव्य ज्यान, ज्यान मार्ने उधोग तथा चोरी लगायतको मुद्धा लागेका उनी प्रहरीको खोजीको सुचिमा थिए ।