काठमाडौं, ७ चैत । प्रधानमन्त्री केपी शर्मा ओलीले सातै प्रदेशका प्रदेश प्रमुखसंग आज छलफल गर्दै हुनुहुन्छ ।

प्रधानमन्त्री ओलीले केहिबेरमा सातै प्रदेशका प्रदेश प्रमुखलाई प्रदेश समस्याबारे छलफलसंग सिंहदरबार बोलाउनुभएको छ । प्रदेश सरकार सञ्चालनमा उत्पन्न भएका समस्या, पूर्वाधार विकासको अवस्थालगायतका विषयमा सातै प्रदेशका मुख्यमन्त्री, प्रमुखसचिव तथा न्यायाधिवक्तासंग जानकारी लिने प्रधानमन्त्री ओलीको योजना छ ।

प्रदेश सरकार बलियो बनाउन केन्द्रबाटै पहल लिन प्रधानमन्त्रीले सातै प्रदेशका प्रमुखलाई बोलाउनुभएको हो । प्रदेशसभा र प्रदेश सरकार सञ्चालनमा कर्मचारी अभाव पनि देखिएको छ । खटाएका कर्मचारी नजाने समस्याको बारेमा पनि योे बैठकमा सम्वन्धित मन्त्रालयका पदाधिकारीसहित छलफल गर्ने सरकारको तयारी छ ।

प्रदेश सरकारले बनाउनुपर्ने कानुनको बारेमासमेत अन्यौल उत्पन्न भइरहेका बेला आजको बैठक डाकिएको हो । सरकार बनेपछि प्रधानमन्त्रीले पहिलो पटक सबै मुख्यमन्त्रीलाई बोलाउनुभएको हो ।