बाग्लुङ, ५ चैत्र । बाग्लुङको बलेवा विमानस्थल २४ वर्षपछि संचालनमा आउने तरखरमा रहेको छ । केही महिनादेखी तयारी भईरहेको विमानस्थलमा सोमबार सफलता पूर्वक परिक्षण उडान गरिएको छ ।

तारा एयरलाइन्सको १८ सिट क्षमताको ९ एन एकेएल जहाजले परिक्षण उडान गरेको हो । नेपाल नागरिक उडड्यन प्राधिकरणले कर्मचारी र प्राविधिक सहित १० जना राखेर जहाज बागलुङको बलेवा मैदानमा अवतरण गरेको छ । जहाज अवतरण गरेसगै ठुलो सख्यामा भेला भएका स्थानीयबासीले हर्षोल्लास मनाएका छन् । बागलुङ नगरपालिकाको अगुवाईमा दुई महिना अघि देखि थालिएको तयारी स्वरुप परीक्षण उडान गरिएको छ ।

चैत ९ गते देखि यात्रीका लागि नेपाल एयरलाइन्स र तारा एयरलाइन्सले नियमित उडान भर्ने सहमति अनुसार सोमबार परीक्षण गरिएको प्राधिकरणका पोखरास्थित निर्देशक भोलाप्रसाद गुरागाईंले बताउनुभयो । पहिलो उडानका क्रममा आएका पाईलटहरु सन्तोष शाह, प्रभाकर घिमिरे र संजीव श्रेष्ठ तथा कोपाईलट सिर्जना हुमागाईंले साना जहाजका लागि बलेवा विमानस्थलमा सहजै उडान भर्न सकिने अवस्थामा रहेको बताउनुभयो । नागरिक उडड्यन प्राधिकरण र दुवै जहाज कम्पनीसँग बागलुङ नगरपालिकाले सम्झौता गरेर १२ सिट भन्दा कम भएमा नगरपालिकाले सिट भार बहन गर्ने गरी जहाज चलाईएको हो ।

नियमित उडान भएमा प्राधिकरणले आगामी वर्ष १५ करोड रुपैयाँ लगानी गरेर मैदानलाई कालोपत्रे गर्ने आश्वासन दिएको छ । चालक शाहका अनुसार बलेवा देखि काठमाण्डौ स्थित त्रिभुवन विमानस्थलमा पुग्न ४५ मिनेटको उडान हुनेछ । २०१८ सालमा निर्माण भएपछि नियमित सञ्चालन भएको विमानस्थल २०४८ सालमा पोखरा–बागलुङ राजमार्गको ट्रयाक खुलेपछि जहाज आउन छाडेको थियो ।