काठमाडौं ९ फागुन । अमेरिकी अधिकारीहरुले युक्रेनका राष्ट्रपति भोलोदिमिर जेलेन्स्कीले महत्त्वपूर्ण खनिज सम्झौताका लागि वार्तामा फर्किनुपर्ने बताएका छन् ।

ह्वाइट हाउसका राष्ट्रिय सुरक्षा सल्लाहकार माइक वाल्ट्जले युक्रेनको महत्त्वपूर्ण खनिजमा अमेरिकी पहुँचमा सम्झौता गर्न आवश्यक रहेको बताउनुभएको हो ।

यसअघि जेलेन्स्कीले युक्रेनको खनिज सम्पदाको एक हिस्सा अमेरिकालाई युद्धकालीन सहायताको लागि फिर्ता गर्न सम्झौता गर्ने अमेरिकी योजनालाई अस्वीकार गर्नुभएको थियो ।

बीबीसीका अनुसार अमेरिकाले सम्झौतामा कुनै विशेष सुरक्षा ग्यारेन्टीहरू प्रस्ताव नगरेको युक्रेनको भनाइ थियो ।

राष्ट्रपति ट्रम्पको प्रस्ताव अस्वीकार गरेर यो हप्ताको शुरूमै युक्रेनले उहाँको अपमान गरेको भन्दै अमेरिकी अधिकारीहरुले युक्रेनको आलोचना गरेका खबरमा उल्लेख छ ।

युक्रेनमा लिथियम र टाइटेनियमसहित महत्त्वपूर्ण तत्व र खनिजहरूको ठूलो भण्डार छ । युक्रेनमा दुर्लभ खनिजहरूमा अमेरिकी पहुँचलाई सहायताको बदलामा साटासाट गर्न सकिने अमेरिकाको सुझाव दिँदै आएको छ ।