काठमाडौं २० माघ । दाङको स्वर्गद्वारी गुठीका मोही किसानहरूले न्यायको माग गर्दै काठमाण्डौको माइतीघरमा धर्ना थालेका छन् । हलो, कुटो कुदालोसहितका कृषि औजार लिएर आएका गुठी पीडित किसानहरूले माइतीघरको सडकमा केहीबेर प्रदर्शन गरेपछि धर्नामा बसेका हुन् ।

गुठी पीडित मोही किसानको हित हुने गरी गुठी ऐन जारी गर्नुपर्ने माग गर्दै आजदेखि अनिश्चितकालीन धर्नामा बसेको उनीहरूले बताएका छन् । स्वर्गद्वारी आश्रमका मोही किसानको मोहीयानी हक प्रमाणपत्र अनुसारको जग्गा प्राप्तिको कानून निर्माणका लागि दबाब दिन आफूहरू धर्नामा उत्रिएको सङ्घर्ष समितिका सचिव भरत गिरीले जानकारी दिनुभयो ।

२०४५ सालदेखि नै जिल्ला केन्द्रित आन्दोलन गर्दै आएकोमा आफूहरूको मागबारे सरकारले सुनुवाइ नगरेपछि अहिले काठमाण्डौमै आएर धर्ना बस्नुपरेको गिरीले बताउनुभयो ।

स्वर्गद्वारी गुठीको मोहीमा दाङका १२ गाउँमा ३ हजार ५ परिवारका १६ हजार जनसङ्ख्याको बसोबास छ । किसानले खेतीपाती गर्दै बसोबाससमेत गर्दै आएको पुस्तौं बिते पनि जग्गा भने स्वर्गद्वारी गुठीको नाममा छ । आफूहरूसँग भएको मोहियानी हक पनि सर्वोच्च अदालतको संयुक्त इजलासबाट परमादेशसमेत जारी गरी खारेजी गरिएको पीडितको गुनासो छ ।