काठमाडौं, १ चैत । जिम्बावेमा भइरहेको वल्डकप क्वालिफायर अन्तर्गत सातौं स्थानका लागि भएको प्ले अफ खेलमा नेपालले पपुआनुगिनीमाथि सानदार जित निकालेको छ ।

ओडिआई स्ट्याटस हात पार्नका लागि महत्वपूर्ण मानिएको खेलमा नेपालले पिएनजीलाई ६ विकेटले हराएको हो।

टस जितेर पिएनजीलाई पहिले ब्याटिङको निम्तो दिएको नेपालले उसलाई ११४ रनमा समेटेको थियो। पपुआनुगिनीले दिएको एक सय १५ रनको लक्ष्य नेपालले २३ ओभरमा ४ विकेट गुमाएर पुरा गर्‍यो।

११५ रनको सामान्य लक्ष्य पाएको नेपालले निर्धारित ५० ओभरको खेलमा २३ ओभरमा ४ विकेट गुमाएर विजयी भयो।

नेपालका लागि अल राउन्ड प्रदर्शन गरेका दीपेन्द्र सिंह ऐरीले अर्धसतकीय पारी खेले। बलिङमा ४ विकेट लिएका उनले ५८ बलमा ५० रन पुरा गरेर नटआउट रहे।

ऐरीले चौथो विकेटका लागि आरिफ शेखसँग ६७ रनको साझेदारीसमेत गरेका थिए।

आरिफ २६ रन बनाएर आउट भए। उनले ४२ बल खेल्दै १ चौका प्रहार गरेका थिए।

यसअघि पपुवा न्युगिनीलाई सस्तैमा समेट्ने सन्दिप लामिछाने र ऐरीले ४(४ विकेट लिएका थिए। सोमपाल कामी र करन केसीले १-१ विकेट लिएका थिए।

ओडीआई स्टाटसको लागि अर्को खेल कुनुपर्ने

नेपालले सातौं स्थानका लागि नेदरल्यान्ड्स र हङकङबीच अहिले भइरहेको खेलको विजेतासँग शनिबार खेल्ने छ।

अहिले भइरहेको अर्को खेलमा नेदरल्याण्डसले हङकङलाई हरायो भने नेपालले अन्तिम खेल अघि नै ओडीआई स्टाटस (एकदिवशीय अन्तर्राष्ट्रिय मान्यता)  पक्का गर्नेछ ।

तर, हङकङले जित्यो भने सातौं स्थानका लागि नेपाल र हङकङबीच खेल हुनेछ र त्यो खेल जित्ने टोलीले एकदिवसीय मान्यता पाउनेछ ।