काठमाडौं ६ माघ । सुप्रिम सहकारीको रकम अपचलसम्बन्धी रवि लामिछाने र छविलाल जोशीविद्धको पूरक मुद्दा जिल्ला सरकारी वकिल कार्यालयले आज आइतबार जिल्ला अदालतमा पठाउने भएको छ । यसअघि पठाइएको जीबी राईसहितका १७ जनाविरुद्धको थप अभियोजन मुद्दा पनि अदालतमा रुजु गर्ने काम भइरहेको छ ।

बिहीबार नै दर्ता गर्ने भनिएको रवि, छविसहित १४ जनाविरुद्धको पूरक अभियोजन मुद्दा समय अभावका कारण भन्दै रोकिएको थियो । तर, शुक्रबार रूपन्देही जिल्ला अदालतमा दर्ता भएको मुद्दाको सक्कल फाइल नै फेला नपरेपछि सरकारी वकिल कार्यालयले पूरक मुद्दा फाइल नै अदालतमा पठाउन सकेको थिएन । अदालतले सुरु मुद्दाको सक्कल फाइल सर्वोच्च अदालतबाट हुलाकमार्फत पठाइएकाले आउन समय लागेको जनाएको थियो ।

वकिल कार्यालयका जिल्ला न्यायाधिवक्ता प्रेमराज पौडेलले आइतबार १ बजेभित्र नै रवि लामिछाने, छविराज जोशीसहित १४ जनालाई प्रतिवादी बनाइएको पूरक मुद्दाको फाइल जिल्ला अदालतमा पठाउने बताए । ‘दर्ता गर्ने नगर्ने अदालतको तयारीको कुरा हो, हामीले आजै १ बजेभित्र पठाउँछौं,’ उनले भने, ‘थप अभियोजनको फाइल रुजु भइरहेकाले रुजु गर्न केही समय लाग्ला, रुजु गरेर सकिएपछि दर्ता हुन्छ ।’

रास्वपा सभापति रवि लामिछाने र गोर्खा मिडिया नेटवर्कका उपाध्यक्ष एवं पूर्वडीआईजी छविलाल जोशीविरुद्धको पूरक मुद्दा दर्तामा ढिलाइ हुँदै आइरहेको छ । अदालत स्रोतका अनुसार आइतबार मुद्दा दर्ता दर्ता गरेर रवि लामिछाने सोमबार अदालत उपस्थित हुने सूचना अदालतमा पठाएका छन् । त्यसैले मुद्दा आइतबार नै रुजु गरेर सकेर दर्ता गर्ने सम्भावना छ । स्रोतका अनुसार रविले आफ्ना तर्फबाट बहस गर्ने वकिलहरूको संयोजन गर्न अधिवक्ता यज्ञमणि न्यौपानेलाई दिएका छन् । वकिलको नामावली आइतबार साँझसम्ममा तयार हुनेछ । त्यसपछि सोमबार बिहानको जहाजबाट रवि भैरहवा आउने गरी तयारी भइरहेको रास्वपा स्रोतले बतायो ।

२०८१ वैशाख ३ गते रुपन्देही अदालतमा सुप्रिम सहकारी ठगीसम्बन्धी सुरु मुद्दा दर्ता भएको थियो । त्यतिबेला लामिछाने गृहमन्त्री थिए । प्रहरीले उनीविरुद्ध मुद्दा दर्ता गरेको थिएन । सरकारी वकिल कार्यालयले सुप्रिम सहकारीका संस्थापक अध्यक्ष एवं हालका संरक्षक गितेन्द्रबाबु ९जीबी० राई, सुप्रिमका वर्तमान अध्यक्ष ओमप्रकाश गुरुङ, कुमार रम्तेल, सागर केसीसहित २८ जनाविरुद्ध सहकारीठगी सम्बन्धमा मुद्दा दायर गरेको थियो । उक्त मुद्दामा रवि र छवि जोडिएका थिएनन् । गृहमन्त्री भएकै कारण उनीविरुद्ध अनुसन्धान गर्न र मुद्दामा अभियोग लगाउन प्रहरीले सकेन ।

बिहीबार सरकारी वकिल कार्यालयले अदालत पठाएको थप मुद्दमामा राईसहितका १७ जनालाई सहकारी ठगी, संगठित अपराधको कसुर र बिगो थपसहितको माग गरेको छ । बिहीबार नै पूरक जाहेरीअनुसार रवि र छविसहित १४ जनालाई थप प्रतिवादी कायम गरेर पुरक मुद्धा दर्ताको तयारी गरेकोप्रहरीले विहिवार सुरु मुद्धाका १७ जना बिरुद्ध सहकारी ठगी तथा संगठित अपराध मुद्धा दर्ता गरेको हो । थप कसुरमा संगठित अपराध र थप २ करोड ७ लाख रुपैंयाँ थप बिगो माग गरिएको छ । सुरु मुद्दामा १ अर्ब ३ करोड बिगो रहेकोमा अहिले २८ जनाविरुद्ध २ करोड ७ लाख र पूरक जाहेरीका १४ जनाविरुद्ध ७ करोड गरी १ अर्ब १२ करोड बिगो माग गरेर मुद्दा दर्ताको तयारी भइरहेको छ । सुप्रिम सहकारीका १ हजार ८ सय ७२ जनाको जाहेरी छ । सुप्रिम सहकारीका १० हजार ३ सय ९१ जना बचतकर्ताको १ अर्ब ३१ करोड अपचलन भएको अनुसन्धानले देखाएको छ ।