काठमाडौं २२ पुस । नेकपा माओवादी केन्द्रले काठमाडौंको जनमत बढाउने उद्देश्यले उपत्यका केन्द्रित एक वर्षे विशेष अभियान चलाउने भएको छ ।

माओवादी केन्द्रका अध्यक्ष पुष्पकमल दाहाल प्रचण्डले विभिन्न १३ एजेण्डासहित विशेष अभियान चलाउने योजना बनाएका हुन् । ती योजना काठमाडौंबाट जारी केन्द्रीय समिति बैठकमा प्रचण्डले प्रस्तुत गरेका छन् ।

प्रचण्डले बैठकमा पेस गरेको राजनीतिक प्रतिवेदनमा लेखिएको छ, ‘केन्द्रीय कार्यालयको प्रत्यक्ष मार्गनिर्देशन हुने गरी एक वर्षको उपत्यका विशेष अभियान कार्यक्रम सञ्चालन गरिने छ ।’
अध्यक्ष प्रचण्डको कार्ययोजना केन्द्रीय समितिबाट स्वीकार भएपछि माओवादीले उपत्यका विशेष अभियान चलाउने छ ।

यस्ता छन् प्रचण्डले अघि सारेका एजेण्डा –

यी १३ वटा लगायतका एजेण्डालाई उठाएर समस्या समाधानको उपायसहित काठमाडौं उपत्यकाका सबै नगर, टोल, वस्ती र घरमा पुग्ने गरी अभियान सञ्चालन गर्ने प्रचण्डको कार्ययोजनामा उल्लेख छ ।

शहरी जनमत कमजोर भएकाले पार्टी संगठनलाई बलियो बनाउने योजनाअनुसार प्रचण्डले कार्ययोजना ल्याएका हुन् । ‘क्रान्तिको रणनीति तथा कार्यनीति कार्यान्वयन गर्न राजधानी लगायतका शहरहरुमा संगठनको काम र त्यहाँका जनताको सहभागिता र संगठनको ज्यादै ठूलो महत्व रहेको स्पष्ट छ’ प्रचण्डको कार्ययोजनमा भनिएको छ ।

उनले अगाडि लेखेका छन्, ‘तर यतिबेला हाम्रो संगठन संघीय राजधानी काठमाडौं उपत्यकामा निकै कमजोर अवस्थामा छ । त्यसैले हामीले उपत्यकामा संगठन निर्माण र विस्तारको कामलाई समान्य ढंगले लिएर सफल हुन सक्दैन । पार्टीले यसका लागि विशेष योजना सहित अभियान सञ्चालन गर्नुपर्दछ ।’