काठमाडौं १५ पुस ।   नेकपा एमालेका महासचिव शंकर पोखरेलले ठूला राजनीतिक दललाई असफल हुने छुट नभएको बताएका छन् । एमाले दाङ प्रचार तथा प्रकाशन विभागले सोमबार बिहान घोराहीमा आयोजना गरेको पत्रकार महासंघका नवनिर्वाचित पदाधिकारीलाई सम्मान तथा साक्षात्कार कार्यक्रममा बोल्दै उनले जनताको अपेक्षाअनुसार दल र सरकारले काम गर्नुपर्ने बताए ।

विगतमा सरकारमाथि अदालतको हस्तक्षेप, अराजकता र अस्थिरताका कारण देशको अर्थतन्त्र समेत कमजोर हुन पुगेको उनले बताए । अहिले देशको आर्थिक अवस्थामा सुधार आइरहेको दाबी उनले गरे ।

राम्रो काम गर्दा गर्दै सरकार ढल्दैछ भनेर हल्ला चलाउने काम भइरहेको उल्लेख गर्दै पोख्रेलले ठूला दलहरू मिलेर बनेको वर्तमान सरकारले योजनाबद्ध सुधारका काम गरिरहेको बताए । कसैलाई चित्त नबुझ्दैमा सरकार ढल्न नसक्ने दाबी उनले गरे । ठूला दल मिलेको चित्त नबुझे पनि मिलिराखेपछि सबैलाई स्विकार्न बाध्यता हुने विचार उनले व्यक्त गरे ।

कतिपय कानुनहरू असान्दर्भिक र कार्यसम्पादनमा बाधा सिर्जना गर्ने खालका भएको बताउँदै उनले यसमा सुधार गर्न ६ सदस्यीय समिति बनाएर काम भइरहेको जानकारी दिए ।

रवि लामिछानेको विषय संसद्को आदेश बमोजिम सरकारी निकायले अनुसन्धान गरी विधिवत् अभियोजन गरिएको काम भएकाले यसमा अनावश्यक भ्रम सिर्जना नगर्न उनले आग्रह गरे । सहकारीको रकम कानुन विपरीत कम्पनीको खातामा राख्नेलाई मुद्दा चलाउने कुरा सरकारको प्रतिशोध भन्न नमिल्ने उनले बताए । नेता आदर्श हुनुपर्नेमा उल्टै पासपोर्ट, नागरिकता, बहुविवाह र सहकारी प्रकरणजस्ता अवैध काम गर्ने र उनैलाई जे पनि गर्न छुट दिने कुरा सम्भव नहुने उनले बताए ।

सत्ता गुमाउँदाको छटपटी गलत प्रचारमार्फत व्यक्त गर्नु राजनीतिक बेइमानी भएको उनले बताए । अहिले माओवादी केन्द्र र स्वतन्त्र पार्टीले योजनाबद्ध रूपमा सरकार र सत्तारूढ पार्टीमाथि साइबर हमला गरिरहेको उनले बताए । विकल्प हौँ भन्दै आएका पार्टीले गलत काम गर्न छुट नहुने भन्दै उनले राम्रो काम मात्रै विकल्प हुनसक्ने धारणा व्यक्त गरे ।