काठमाडौं ११ पुस । सत्तारुढ नेपाली कांग्रेसका प्रमुख सचेतक श्यामकुमार घिमिरेले निजामती कर्मचारीमा राजनीतिक दलका ट्रेड युनियन खोल्न दिनै नहुने बताएका छन् । कांग्रेस पार्टीको धारणा नै कर्मचारीतन्त्रमा राजनीतिक दलका ट्रेड युनियन खोल्न नहुने रहेको घिमिरेले स्पष्ट पारे ।

प्रतिनिधिसभाअन्तर्गतको राज्यव्यवस्था तथा सुशासन समितिको बिहीबारको बैठकमा संघीय निजामती सेवाको गठन, सञ्‍चालन र सेवाका सर्त सम्बन्धमा व्यवस्था गर्न बनेको विधेयकमाथि पार्टीको धारणा राख्दै कांग्रेस प्रमुख सचेतक घिमिरेले सरकारबाट तलब खानेहरूले पार्टीगत ट्रेड युनियनमा सहभागी हुन नहुने बताए । निजामती सेवामा ट्रेड युनियन पार्टीगत त खोल्न दिनै हुँदैन । सरकारी पे रोलमा रहेकाले कुनै पनि संगठन खोल्न मिल्दैन, उनले भने ।

सरकारबाट तलब खानेहरूले पार्टीगत संगठन खोलेर सरकारको जग्गा र बजेटमा भवन निर्माण गरेर ट्रेड युनियन खोल्न दिइएको भन्दै उनले आपत्ति जनाए । उनले आफ्नो कांग्रेस पार्टीको आधिकारीक धारणा रहेको स्पष्ट पारे ।

यो ट्रेड युनियन, पार्टीगत ट्रेड युनियन हटाउन पर्‍यो । राख्ने भए एउटा आधिकारिक ट्रेड युनियन राख्नुपर्छ त्यसमा पनि शाखा अधिकृत तहकालाई बस्न दिनुहुन्न, उनले भने, नीति निर्माणको तहमा रहेकालाई रहेकालाई ट्रेड युनियनमा बस्न दिनहुन्न । नीति निर्माण गर्ने तहमा पनि बस्ने अनि ट्रेड युनियनको मजदुर पनि भएर बस्न पाइन्छ रु पार्टीगत ट्रेड युनियन हटाउनुपर्छ ।

शाखा अधिकृतभन्दा तल्लो तहकालाई मात्रै ट्रेड युनियनमा राख्नुपर्ने प्रमुख सचेतक घिमिरेले बताए ।