काठमाडौं २८ मंसिर । नेकपा माओवादी केन्द्रका अध्यक्ष पुष्पकमल दाहाल प्रचण्डले आफ्नो सरकारले गरेका सुधारका काम अहिलेको सरकारलाई घाडो भएको बताएका छन्।

धादिङको बेनीघाट रोराङ्ग गाउँपालिका ८ बिधाङको कालिका माध्यामिक विद्यालयमा बिहीबार आयोजित एकीकृत छात्रावास उद्घाटन तथा चैलिङ नमुना पर्यटकीय गन्तव्य गाउँ प्रवर्द्धन कार्यक्रमलाई सम्बोधन गर्दै अध्यक्ष प्रचण्डले यस्तो बताएका हुन्।

उनले नेपालको अर्थतन्त्र अहिले एक दर्जनदेखि दुई दर्जन बिचौलियाको हातमा रहेको उनले बताए। ‘नेपालको अर्थतन्त्र जनताको हातमा छैन। नेपालको राजनीति त जनताको हातमा आयो। तर देशको अर्थतन्त्र जनताको हातमा आएको छैन। यसमा केही प्रयास भएका थिए। तर बिचौलिया र दलालहरुलाई सह्य भएन,’ प्रचण्डले भने।

शिक्षाको सुधारका लागि आफूले शिक्षा विधयेकमा सहमति कायम गरेर अगाडि बढेको उनको भनाई थियो। ‘राजनीतिक भागबन्डा गरेर विश्वविद्यालयहरुमा भीसी, रेक्टर, रजिस्टार, डिनहरु नियुक्ति गर्दा विश्वविद्यालयको गुणस्तर पूरै खस्कियो। विद्यार्थीहरु देश छोडेर विदेस पलायन भए। विश्वविद्यालयहरुमा तालाबन्दि, नाराबाजी, अराजकताको स्थिति आइरह्यो,’ प्रचण्डले भने, ‘त्यो अराजकता तोड्न मैले शिक्षामा सुधारको जोखिम उठाउनुपर्छ भनेर मेरिटोक्रेसिका आधारमा भिसि, रेक्टर, रजिस्टार र डिनहरु नियुक्त गर्ने प्रक्रिया आगाडि बढाए। अहिलेको सरकारलाई त्यो घाँडो भएको छ।’

शिक्षामा भागबन्डा गरेर विश्वविध्यालयहरूमा भीसी रेक्टर नियुक्त हुँदा शिक्षाको गुणस्तर घट्ने र युवा विधार्थी पलायन हुने स्थित बढेपछि त्यसलाई रोक्न आफुले शिक्षा क्षेत्रको सुधारमा गर्नमा गरेको पहललाई अहिले उल्टाउने खेल भैरहेको दाबी उनले गरे।

सरकारलाई राम्रो होइन, आफ्नो मात्रै चाहिएको बताउँदै प्रचण्डले भने, ‘विश्वविद्यालयमा मैले सुरुवात गरेको मेरिटोक्रेसिले राम्रो असर र प्रभाव देखाउन थाल्यो तर अहिलेको सरकारलाई राम्रो चाहिएको छैन । आफ्नो चाहिएको छ। अहिले विश्वविद्यालयका भीसीहरुलाई मेरिटोक्रेसी तोड्न सरकारले निकै ठूलो दबाब दिइरहेको छ। अहिलेको सरकारलाई जहाँ राम्रो छ त्यहाँ प्रहार गर्नुपरेको छ। राम्रो मान्छे चाइएन उनीहरूलाई आफ्नो मान्छे चाहियो। अस्ति मात्रै मैले केही भीसीहरूलाई भेटेर सत्यका पक्षमा लड्नुस् भनेको छु। मैले भ्रष्टाचार र विकृतिकाविरुद्ध लड्दा प्रधानमन्त्री छोड्न तयार भएँ। तपाईहरु पनि सत्यका पक्षमा लड्नुहोस् मेरिटोक्रेसी नछोड्नुस्। योग्यहरू नियुक्ति गर्ने कुरा खुट्टा नकमाइ अगाडि बढ्नुस भनेको छु।’

आफू तीन पटक प्रधानमन्त्री हुँदा विभिन्न क्षेत्रको सुधारमा मिहनेत गरेको दाबी उनले गरे। अहिले आफू सरकार बाहिर रहे पनि सुशासन, सामाजिक न्याय र समृद्धिको पक्षमा निरन्तर लागिरहेको उनको भनाई थियो।

आफूले तेस्रोपटक सरकारको नेतृत्व गर्दा भ्रष्टाचारका विरुद्ध र सुशासनका पक्षमा, विभेदका विरुद्ध र सामाजिक न्यायका पक्षमा काम गरेको प्रचण्डले बताए।

‘मैले आर्थिक संकटको अन्त्य गर्दै समृद्धिको पक्षमा काम गरेँ। संघीय लोकतान्त्रिक गणतन्त्रका लागि जोखिम उठाएर लडेको पार्टी र नेताको हैसियतले संघियता कार्यान्वयनका लागि विभिन्न विधयेक र ऐनहरु बनाउने काममा मिहनेत गरेँ,’ उनले भने।

भ्रष्टाचारविरुद्ध सुशासनको अभियान र अर्थतन्त्रमा सुधारको पहल गरेका कारण आफू नेतृत्वको सरकार ढालिएको बताउँदै प्रचण्डले केपी ओली नेतृत्वको सरकार अपारदर्शी र अप्राकृतिक तरिकाबाट बिचौलिया र माफियाहरुले बनाइदिएको आरोप लगाए।

‘सरकार परिर्वतन जुन जालझेल तरिकाले, अपारदर्शी र अप्राकृतिक तरिकाले गरियो, त्यो स्वाभाविक छैन,’ प्रचण्डले भने, ‘एमाले अध्यक्ष केपी जीले मैले प्रचण्डलाई राउण्ड किक दिएर हटाएँ भन्दै हुनुहुन्छ। राउण्ड किक दिएको रे उहाँले। स्वर्ग नि सँगै नर्क नि सँगै जाने भनेर म प्रधानमन्त्री हुँदा मसँग चार घण्टासम्म कुरा गरेर जालझेलबाट तरिकाबाट यो सरकार बनेको हो। यो बचौलियाले, दलालहरुले बनाइएको सरकार हो।’