काठमाडौं २६ मंसिर । नेपाल प्रिमियर लिग ९एनपीएल०को पाँचौँ खेलमा आएर जनकपुर बोल्ट्सले पहिलो हार व्यहोरेको छ।

बुधबारको पहिलो खेलमा सुदूरपश्चिमसँग ७२ रनको फराकिलो अन्तरले पराजित हुँदै जनकपुरले पहिलो हार भोगेको हो।

जनकपुरले पहिलो हार भोगेको दिन सुदूरपश्चिमले भने लिगमा चौथो जित निकालेको छ। योसँगै अंक तालिकाको शीर्ष र दोस्रो स्थानमा रहने टोलीले समान एक खेलमा हार र चार खेलमा जित निकालेका छन्।

जितसँगै सुदूरपश्चिमले ५ खेलबाट ८ अंक जोडेको छ। पराजित जनकपुरको पनि समान खेलबाट ८ अंक छ। यो जितपछि सुदूरपश्चिमले जनकपुरसँग अंकतालिकाको शीर्ष स्थान खोसेको छ।

सुदूरपश्चिमले दिएको १ सय २४ रनको लक्ष्य पछ्याएको जनकपुर १२।१ ओभरमा ५१ रन बनाउँदा अलआउट भयो।

जनकपुरलाई कम स्कोरमा रोक्न हरमित सिंह, ईशान पाण्डे र दीपेन्द्रसिंह ऐरीले समान २ विकेट लिए। नरेन साउद, सैफ जैव र स्कट कुग्लेजिनले हसमान एक विकेट लिए। हरमितले आफ्नो स्पेलमा २ मेडन राख्दै मात्र २ रन दिँदा २ विकेट झारे।

जोसुवा ट्रम्पले बनाएको १३ रन नै जनकपुरका लागि सर्वाधिक रह्यो। अन्य कुनै ब्याटरले दोहोरो अंकको स्कोर छुन सकेनन्।

त्यसअघि कीर्तिपुरस्थित त्रिवि क्रिकेट मैदानमा जनकपुरले टस जितेर फिल्डिङ रोजेपछि ब्याटिङ गरेको सुदूरपश्चिमले निर्धारित २० ओभरमा ९ विकेटको क्षतिमा १ सय २३ रनको योगफल तयार पारेको थियो।

पहिलो विकेटका लागि ओपनर सैफ जैव र विनोद भण्डारीले ७।४ ओभरमा ५५ रनको साझेदारी गर्दै सुदूरपश्चिमलाई राम्रो सुरुवात दिलाएका थिए।

ओपनर जैव २१ बलमा २ छक्का सहयोगमा २१ रन बनाउँदै हर्ष ठाकरको बलमा अरनिको यादवको हातबाट क्याच आउट हुनपुगे।

अर्का ओपनर भण्डारी ३३ रन बनाउँदै क्याच आउट भए। ३७ बलमा ३ चौका र १ छक्का हानेका भण्डारी शेर मल्लको बलमा जोस्वा ट्रम्पको हातबाट क्याच आउट भए।

ईशान पाण्डे १७ रन बनाउँदै किशोर महतोको बलमा निशमको हातबाट आउट हुन पुगे। तेस्रो नम्बरमा ब्याटिङमा आएका हरमित सिंह १ रन बनाउँदा शेर मल्लको बलमा बोल्ड आउट भए।

११ रन बनाएका ब्रान्डोन म्याकमुलेन अरनिको यादवको बलमा ट्रम्पको हातबाट क्याच आउट भए। कप्तान ऐरी शून्य रनमा अरनिको यादवको ट्रम्पको हातबाट क्याच आउट नै हुन पुगे।

जनकपुरका लागि किशोर महतोले ४ विकेट लिए। उनले आफ्नो स्पेलमा ३५ रन खर्चे।

उनले १८ औँ ओभरमा लगातार ३ विकेट लिएपछि सुदूरपश्चिमको ब्याटिङ लाइन धरापमा परेको थियो। १८औँ ओभरको पहिलो बलमा आरिफ शेखलाई आउट गराएका किशोरले तेस्रो बलमा ईशान पाण्डेलाई पेभेलियनको बाटो देखाएका थिए।

सोही ओभरको अन्तिम बलमा स्कट कुग्लेजिनलाई ७ रनमा बोल्ड आउट गरे। किशोरले नै अन्तिम ओभरको पहिलो बलमा नरेन साउदलाई ३ रनमा क्याच आउट गराए।

अरनिको यादव र शेर मल्लले समान २ विकेट लिए। हर्ष ठाकरले एक विकेट आफ्नो नाममा गरे। किशोर महतो र हर्ष ठाकरले एक–एक विकेट आफ्नो नाममा गरे। ललित राजवंशी विकेटविहीन रहे। ललित पहिलो खेलमा विकेटविहीन हुनपुगेका हुन्।

आजै हुने दिनको दोस्रो खेलमा काठमान्डु गुर्खाज र लुम्बिनी लायन्स भिड्दै छन्। सो खेल दिउँसो १ बजे सुरु हुनेछ। प्लेअफमा स्थान बनाउन संघर्षरत दुवै टोली जितको लक्ष्यमा मैदान उत्रिनेछन्।