काठमाडौं २ कात्तिक । माओवादी केन्द्रका उपमहासचिव वर्षमान पुनले तीन महिना बितिसक्दा पनि कांग्रेस–एमाले गठबन्धन सरकारले लय समात्न नसकेको बरू बिचौलियाको स्वार्थमा काम गर्न थालेको आरोप लगाएका छन् ।

गृहजिल्ला रोल्पाको राङसीमा सहीद स्मृति युवा क्लवको १५औं वार्षिकोत्सवमा बोल्दै उनले सरकार जनआकांक्षा र भावनाअनुसार नचलेको धारणा व्यक्त गरे ।

‘बिचौलिया तत्वहरुले प्रमुख दुई दललाई प्रभावमा पारेर आफ्नो स्वार्थमा सरकार बदल्ने काम गरे’, पुनले भने, ‘नयाँ सरकार बनेको तीन महिना भयो । सरकारले कुनै नयाँ उत्साह जगाउन, नयाँ कार्यक्रम ल्याउन र सकारात्मक बाटो लिएको छैन ।’

सरकारले जनतामा आशा जगाउन नसकेको र मुलुकका निराशा बढ्दै गएको उनको भनाइ छ । सरकारमा रहका दलहरुलाई जनताका आकांक्षा र भावनाअनुसार काम गर्न सुझाउँदै उनले प्रमुख प्रतिपक्षीको हैसियतमा आफ्नो दलले राम्रो कामका लागि सहयोग गर्ने र खराब काम गर्दा विरोध गर्ने स्पष्ट गरे ।