काठमाडौं, १० साउन । हाम्रो देशमा गर्भपतनले कानुनी मान्यता पाएको छ । तर, समाजले अझै पनि मान्यता दिन सकेको छैन । समाजले गर्भपतनलाई मान्यता नदिनुका धेरै कारणहरु छन् । हाम्रो देशमा विवाह अगाडीको यौन सम्बन्धलाई अवैधानिक मानिन्छ । हाम्रो समाजले परपुरुष या परस्त्रीसंगको यौन सम्बन्धलाई अपराध नै मान्छ । तर, पछिल्लो वर्षहरुमा सामाजिक मान्यताकै आधारमा मान्ने हो भने हाम्रो देशमा अवैधानिक सम्बन्धहरु बढिरहेका छन् ।

अबैधानिक सम्बन्धहरु बढेसँगै गर्भवतन गराउनेको संख्या स्वभाविक बढ्छ । अबैधानिक सम्बन्धहरुबाट रहन गएको गर्भहरुनै समाजको डरले पतन गर्नुपर्ने हुन्छ । तर, गर्भपतन गर्नेको संख्या बढ्नुमा अवैधानिक यौन सम्बन्ध मात्र कारण होइन । वैधानिक तर, असुरक्षित यौन पम्पर्कका कारण गर्भधारण गरेका महिलाहरुले पनि उत्तिकै मात्रामा गर्भपतन गराउने गरेका छन् ।

इज्जत प्रतिष्ठा किनेर पाईदैन । नेपाली समाजमा गर्भपतन गराउदा इज्जत फालिएको संज्ञा दिइन्छ । त्यसमा पनि अविवाहित र विवाह भए पनि श्रीमान आफूभन्दा टाढा भएका महिलाका लागि यो ठूलो सामाजिक समस्या नै बन्ने गर्छ । अबैधानिक र अनैतिक मानिने यौन सम्बन्धमा महिलाले खुलेर गर्भपतन गराउने सम्भावना कम हुन्छ । त्यसैले उनीहरु असुरक्षित गर्भपतन गराउन वाध्य छन् ।

यसले गर्दा महिलाहरु ज्यानै जोखिममा राखेर असुरक्षित गर्भपतन गराइरहेका हुन्छन । बैदेशिक रोजगारका कारण परपुरुष र परस्त्रीसंगको बढ्दा अबैधानिक सम्बन्ध र होटल रेष्टुरेष्टमा हुने अनैतिक सम्बन्ध गर्भपतनको मुख्य कारण बन्ने गरेको छ । सामाजिक आरोपबाट तनावमुक्त हुन महिलाहरुले लुकीछिपि गर्भपतन गर्ने गरेको पाइएको छ ।

आफ्नो ईच्छा अनुसार सन्तान नभए गर्भपतन गराउने चलन पनि बढ्दो छ भने श्रीमान श्रीमतीबीच समझदारीमै ढिलो सन्तान जन्माउन पनि गर्भपतन गराउने प्रबृत्ति बढ्दो छ । गर्भनिरोधक औषधीको प्रयोग नगर्ने र बाध्यताले गर्भपतन गराउन आउनेको संख्या बढीरहेको स्त्रीरोग विशेषज्ञ डक्टर भोला रिजालको भनाइ छ ।

ग्रामीण भेगमा अहिले पनि गर्भनिरोधका साधन पुगेका छैनन् । कतिपय नागरिकमा जनचेतना पनि कम छ । यसकारण पनि अनिच्छित र असुरक्षित गर्भपतन गराउनेहरु बढेको डक्टर रिजालको अनुभव छ ।

गर्भनिरोधक औषधीको पहुच सबैमा सरकारले पुर्याउन नसकेका कारण असुरक्षित गर्भपतन गराउनेको तथ्यांक बढ्दो रहेको कृपाका सहनिर्देशक महेश पुरी बताउंछन् । बांझोपन तथा स्त्री रोग विशेषज्ञ डक्टर नुतन शर्मा पनि गर्भपतन गराउनेहरु बढ्दै गएको स्वीकार गर्छिन् । सबैभन्दा बढी कलेज तथा स्कूलका टिन एजर र भर्खर विवाह भएका नयाँ जोडीहरु गर्भपतन गराउन डक्टर नुतन शर्माकहां पुग्छन् । विवाह नगरी यौन सम्बन्ध राख्ने जोडीहरु र श्रीमान बाहिर भएका महिलाहरु गर्भपतनका लागि आउने गरेको डक्टर नुतन शर्माको अनुभव छ ।

किशोर अवस्थामा हुने अपरिपक्वताका कारण राखिने शारिरीक सम्पर्क, यौन चाहना र इन्टरनेटमा सहजै फेला पर्ने अश्लील भिडियोबाट प्रभावित भएर कौतुहलता मेटाउन खोज्दा गर्भ रहने र समाज तथा परिवारको डरले गर्भपतन गराउनेको संख्या बढने गरेको तथ्यांक छ । नेपालमा ३३ प्रतिशत राजश्व बैदेशिक रोजगारीले धानेको छ, तर त्यही बैदेशिक रोजगारीका कारण गर्भपतनको बिकृति भित्रिरहेको छ । गर्भपतनको मुख्य कारण बैदेशिक रोजगार भएको तर्क गर्छन् जिल्ला सरकारी वकिल कार्यलय काठमांडौका उपन्यायाधिबक्ता मणिराम न्योैपाने ।

नेपालमा यौनको अवैध व्यापार चलेको छ । यसका बारे बेखबर कोही छैन । यसलाई व्यवस्थित गर्न नसक्दा टोल र शहरमा विकृति बढेको छ । उनीहरुका लागि गर्भपतनको बैधानिकताले गलत काममा लाग्न झन प्रेरित गरिरहेको छ ।

गर्भपतन गराउनै पर्ने बाध्यताको मुख्य कारण असुरक्षित यौन सम्पर्क हो । बजारमा जतातै गर्भनिरोधक सामग्री पाइन्छ । तर, नेपालीहरुमा गर्भ निरोधक सामग्री प्रयोग गर्ने बानी नै बसेको छैन । बरु, गर्भपतनको औषधी सेवन गर्ने धेरैलाई बानि परिसकेको छ । बजारका गल्ली–गल्लीमा गर्भपतन गराउने स्वास्थ्य संस्थाहरु भेटिन्छन् । जो अवैधानिक रुपमा गर्भपतन गराने र रातारात मालामाल हुने सपना साचेर बसेका हुन्छ ।

पैसा कमाउने एक मात्र उदेश्यले खोलिएका यस्ता स्वास्थ्य संस्थाहरु महिलाको स्वास्थ्यमा पर्ने कुनै पनि असर ख्याल गर्दैनन् । त्यसको सिकार महिलाहरु बन्ने गरेका छन् ।