बेरुत १७ असोज, एजेन्सी । लेबनानस्थित सिया मुस्लिम समूह हेजबुल्लाहसँगको लडाइँमा ८ इजरायली सैनिक मारिएका छन् । इजरायली रक्षा बल ९आईडीएफ० ले लडाइँका क्रममा क्याप्टेन इतान इत्ज्याक ओस्टसहित ८ सैनिकको ज्यान गएको जनाएको हो ।

आईडीएफका अनुसार २२ वर्षीय ओस्टले इगोज इकाइका कमाण्डर थिए । इगोज इकाइका अन्य तीन सैनिकले ज्यान गुमाएका हुन् । आईडीएफका अनुसार ७ सैनिक घाइते छन् ।

आईडीएफ र हेजबुल्लाहबीच लेबनानको दक्षिणी क्षेत्रमा भीषण लडाइँ भइरहेको अन्तर्राष्ट्रिय सञ्चारमाध्यमहरूले जनाएका छन् । बीबीसीका अनुसार आईडीएफ इजरायल र गोलान हाइट्सलाई छुट्याउने ‘ब्लू लाइन’ उल्लंघन गरी दक्षिणी लेबनानमा करिब चारसय मिटर भित्र प्रवेश गरेको भए पनि पछि हटेको छ ।

त्यसपछि आईडीएफ लेबनानको पूर्वी क्षेत्रबाट मारुन अल–रस सहरमा घुसपैठ गरेपछि लडाइँ भएको हेजबुल्लाहले जनाएको छ । मारुन अल–रस सहर इजरायल–लेबनान सीमाबाट करिब २ किलोमिटर दूरीमा छ ।

हेजबुल्लाहले भने लडाइँमा भएको क्षतिका विषयमा केही उल्लेख गरेको छैन । हेजबुल्लाहका प्रवक्ताले दक्षिणी लेबनानमा बुधबार आईडीएफसँगको झडप ‘पहिलो चरणको युद्ध’ को हिस्सामात्रै भएको प्रतिक्रिया दिएका छन् ।