काठमाडौं २५ साउन । हरेक वर्ष श्रावण शुक्ल पञ्चमीका दिन मनाइने नागपञ्चमी पर्व आज शुक्रबार घरका मूलढोकामा नागको तस्बिर टाँसी पूजार्चना गरी मनाइँदै छ।

यसरी नागको तस्बिर टाँस्दा वर्षभर घरमा नाग, सर्प र बिच्छीलगायत जीवले दुःख नदिने र अग्नि, मेघगर्जन र चट्याङको भयबाट पनि बच्न सकिने धार्मिक विश्वास छ।

नाग पूजाको प्रचलन वैदिक कालमै सुरु भएको हो। वैदिक मान्यतानुसार नागलाई सर्पको राजा मानिन्छ।

नाग रिसाए भने पानीको अभाव हुने भएकाले नागलाई खुसी पार्न पूजा गर्ने परम्परा बसेको बताइन्छ।

वराहपुराणअनुसार यसै तिथिमा नागराजसँग ब्रह्माको संवाद भएकाले पनि आजको दिन नागपूजाका लागि प्रसिद्ध मानिन्छ।

यसै क्रममा आज भक्तपुरस्थित नागदहमा पनि नागपञ्चमी पर्व मनाइएको छ।

स्थानीयले पोखरीको बीचमा रहेको नागको मूर्तिमा पूजा गरी पर्व मनाएका हुन्।

आज नागलाई गाईको दूध, अक्षता, दूबो, खीर र रोटीलगायत परिकार प्रसाद चढाउने गरिन्छ।