काठमाडौं २६ असार । नेकपा एमालेका अध्यक्ष केपी शर्मा ओलीले प्रदेशहरूमा महिनापिच्छे सरकार फेरिने अवस्था भएकाले अस्थिरता मच्चिएको बताएका छन्। बुधबार पार्टी सचिवालय बैठकलाई सम्बोधन गर्दै उनले दलगत स्वार्थका लागि बार्गेनिङ गर्ने प्रवृत्ति समेत बढेको टिप्पणी गरे।

‘प्रदेशहरूमा महिना महिनामा सरकार फेरिने अवस्था बन्ने, कहिले यसकातिर, कहिले उसकातिर जाने, यस्ता खालका अस्थिरता, ुबार्गेनिङु, आफ्ना निजी र दलगत स्वार्थलाई केन्द्र भागमा राखेर जाने काम भयो,’ ओलीले भने, ‘विकास निर्माणलाई केन्द्र भागमा नराख्ने, जनताका आवश्यकता, कामलाई केन्द्र भागमा नराख्ने, यसरी विभिन्न ढंगले भ्रष्टाचार, अस्थिरतामा जाने काम भयो।’

संघीयतालाई सफल बनाउनुपर्ने आवश्यकता भएको भन्दै ओलीले खाली संविधानप्रति ओठे भक्ति देखाएर मात्रै नपुग्ने बताए। ‘संघीयतालाई सफल बनाउने दिशामा जानुपर्छ, त्यो पक्षमा विचार नै नगर्ने, खाली संविधानप्रतिको ओठे भक्ति देखाएर संविधानलाई व्यवहारमा असफल बनाउने खालका प्रयास स्वीकार्य हुन सक्दैनन्,’ उनले भने।