काठमाडौं २६ असार । हङकङ र मुख्यभूमि चीनको सेन्जेन सीमानाकाका अधिकारीले मंगलबार एउटा अनौठो घटनाको सामना गरेका छन्।

सेन्जेन भन्सारले सामाजिक सञ्जाल वि च्याटमा पोस्ट गरेअनुसार एक पुरुष यात्रीलाई फ्युसन चेकपोइन्टको हरियो च्यानलबाट सीमापार गर्न लागेको अवस्थामा चेकजाँच गर्दा उक्त अनौठो परिस्थितिको सामना गरिएको हो।

चेकजाँचका क्रममा चिनियाँ अधिकारीले उक्त यात्रीले लगाएको ट्राउजरको खल्तीमा ६ वटा ड्रस्टिङ क्यान्भास झोला फेला पारेका थिए, जसमा विभिन्न रंग र आकारका १०४ वटा जिवित सर्प थिए।

ती सर्प मिल्क स्नेक, वेस्टर्न होग्नोज स्नेक, कोर्न स्नेक, ब्ल्याक र्‍याट स्नेक, बुलस्नेक लगायत प्रजातिका गैरविषालु रहेको भन्सार कार्यालयले जनाएको छ।

बरामद सर्पमध्ये ब्ल्याक र्‍याट स्नेकलाई मूल निवासी मानिन्छ भने अन्य विदेशी प्रजातिका हुन्। विदेशी प्रजातिको सर्पलाई मुख्यभूमिमा अनुमतिविना आयात गर्न निषेध गरिएको छ।

मुख्यभूमिमा सर्प तस्करीको प्रयास नौलो त होइन तर यति धेरै संख्यामा सेन्जेन सीमाबाट पार गर्न खोजिएको यो ठूलो परिमाणको घटना हो।

डिसेम्बर २०२२ मा पनि एक महिलाले ६ वटा लोपोन्मुख जंगली सर्प सीमापार गर्न खोजेको अवस्थामा पक्राउ परेकी थिइन्।

त्यस्तै, २०२२ कै जुलाईमा अर्की महिलाले ब्रामा ४ वटा कर्न स्नेक लुकाएर सीमापार गर्न खोजेको अवस्थामा पक्राउ परेकी थिइन्।

पछिल्लो समय १०४ वटा सर्पसहित समातिएका व्यक्तिको नाम र उमेर सेन्जेन भन्सारले सार्वजनिक गरेको छैन।

अनुमतिविना विदेशी प्रजातिको सर्प भित्र्याउनु मुख्यभूमिको नियमानुसार गैरकानुनी भएकोले यसबारे थप अनुसन्धान भइरहेको अधिकारीहरूले बताएका छन्। एजेन्सी