काठमाडौं १६ जेठ । प्रधानमन्त्री कप एनभीए महिला तथा पुरुष भलिबल लिगको उद्घाटन खेलमा टिपटप हेल्प नेपाल स्पोर्टस् क्लब र बूढानीलकण्ठ भलिबल क्लब खेल्ने भएका छन्।
नेपाल भलिबल संघले बुधबार सार्वजनिक गरेको खेल तालिकाअनुसार पहिलो दिन शनिबार पुरुषतर्फ चार र महिलातर्फ २ खेल हुनेछन्।
सेमिफाइनलअघि हरेक दिन ६ खेल हुनेछन्। लिग चरणमा पुरुषतर्फ ४ र महिलातर्फ दुई खेल हुने संघले जानकारी दिएको छ।
लिगको महिला पुरुष दुवैतफेर्का विजेताले समान ८ लाख तथा उपविजेताले ४ लाख रुपैयाँ पाउनेछन्। तेस्रो हुने टोलीले २ लाख रुपैयाँ हात पार्नेछन्।
दुवैतर्फका सर्वोत्कृष्ट खेलाडीले जनही ५० हजार रुपैयाँ पाउनेछन्।
यसैगरी दुवैतर्फका उत्कृष्ट लिबेरो, सरभर, ब्लकर, लिफ्टर, स्पाइकर र प्रशिक्षकले जनही २० हजार रुपैयाँ प्राप्त गर्नेछन्।
लिग यही जेठ १९ देखि २६ गतेसम्म त्रिपुरेश्वरस्थित राष्ट्रिय खेलकुद परिषद्को कभर्डहलमा हुनेछ।
गत चैतमा सम्पन्न आठौँ आरबीबीएभीए भलिबल च्याम्पियनसिपबाट छनोट भएका महिलातर्फ ६ र पुरुषतर्फ ८ टोलीले लिगमा स्पर्धा गर्नेछन्। लिगमा सहभागी टोलीले ३ विदेशी खेलाडी राख्न पाउनेछन्।
पुरुषतर्फ हेल्प नेपाल, त्रिभुवन आर्मी क्लब, नेपाल पुलिस क्लब, गण्डकी प्रदेश भलिबल संघ, नेपाल एपीएफ क्लब, सुदूरपश्चिम स्पोर्ट्स् काउन्सिल, कोसी प्रदेश र बूढानीलकण्ठ भलिबल क्लबले स्पर्धा गर्नेछन्।
महिलातर्फ एभरेस्ट भलिबल क्लब, नेपाल पुलिस क्लब, एपीएफ क्लब, चन्द्रागिरि नगरपालिका न्यु डायमन्ड, त्रिभुवन आर्मी क्लब र कर्णाली प्रदेशले प्रतिस्पर्धा गर्नेछन्। 
प्रतिक्रिया दिनुहोस्