काठमाडौं ११ फागुन । नबनिर्वाचित प्रधानमन्त्री केपी शर्मा ओली आजदेखि ६६ वर्ष पूरा गरी ६७ वर्ष प्रवेश गरेका छन् । सामान्यत राती दुई बजेपछिमात्र सत्ने बानीका कारण प्रधानमन्त्री ओलीले जन्मोत्सवको केक अघिल्लो राती नै श्रीमति राधिका शाक्यका साथमा काटेका थिए ।

ओलीको जन्मदिनका अवसरमा पार्टीका नेता, कार्यकर्ता र शुभेच्छुकले सामाजिक सञ्जाल मार्फत दिएका शुभकामना भाइरल भइरहको छन् । त्यसो त आजै बसेको स्थायीय समितिको बैठक नै पार्टी अध्यक्ष समेत रहेका प्रधानमन्त्रीको जन्मदिनको केक काटेर सुरु भएको थियो ।

प्रधानमन्त्रीको जन्मदिनका अवसरमा एमाले पार्टी कार्यालयले सूर्य चिन्ह अंकित केक बालुवाटार पुर्‍याएको थियो। स्थायी कमिटीको बैठकअघि प्रधानमन्त्रीले त्यो काटेका थिए। उता शुक्रबार नै मदन भण्डारी स्पोर्टर्स एकेडमीले फुटबलको आकारको केक बालुवाटार लगेको थियो।

प्रधानमन्त्रीलाई भारतीय र चिनियाँ राजदूतले बालुवाटारमै पुगेर जन्मदिनको शुभकामना दिएका छन् । जन्मदिनको शुभकामना सहित राजदूतहरुले कार्यकाल सफता र दिर्घायूको कामना गरेको प्रधानमन्त्रीका प्रेस संयोजक चेतन अधिकारीले जानकारी दिए।

१४ वर्ष लामो कारावासमा गुजारेको ओलीले जीवनको उत्तरार्धसम्म जन्मदिन नमनाएपनि समर्थकमाझ चार वर्षअघि निजी निवास बालकोटमा जमघट आयोजना गरेका थिए। त्यो जन्मदिन मनाएको बर्षमा ओली संसदीय दलको नेता र पार्टी अध्यक्ष भएपछि जन्मदिन मनाएको भन्दै पार्टीभित्रको प्रतिपक्षीहरुबाट आलोचना भएको थियो।

२००८ साल फागुन ११ गते तेह्रथुमको इवामा जन्मिएका ओली समकालिन नेताहरुमा सबैभन्दा बढी संघर्षशील तथा राजनीतिक अडान लिने राष्टवादी नेता हुन् ।

ओली ०५१ सालको अल्मतको सरकारमा गृहमन्त्री, ०६२ पछि गिरिजा कोइरालाको सरकामा परराष्ट्रमन्त्री र नयां संविधान जारी भएपछि प्रधानमन्त्री भएका थिए । हालै सम्पन्न निर्वाचनमा माओवादीसंग तालमेल गरी अधिक बहुमत प्राप्त मात्र गरेनन् माओवादीसंग पार्टी एकता समेत गर्ने सफलता प्राप्त गरेका छन् ।

फोटो :प्रधानमन्त्रीको नीजि सचिवालय