धनकुटा, १० फागुन । धनकुटा महोत्सव तथा प्रदेश नम्वर १ स्तरीय औद्योगिक तथा व्यापार मेला फागुनको २० गतेदेखी सुरु हुने भएको छ । धनकुटामा प्रदेश १ को स्थायी राजधानी माग गर्दै केही दिन अघिसम्म जारी आन्दोलनका माघ २९ गते देखि सुरुहुने भनिएको महोत्सव फागुन २० गते देखि संचालनमा आउने भएको आयोजक उद्योग वाणिज्य संघ धनकुटाले जानकारी दिएको छ । महोत्सवमा कृषि र पर्यटनलाई विषेश प्राथमिकता दिईने छ ।

घरेलु तथा साना उद्योगबाट उत्पादित वस्तु एवं कृषि उपज लगायत नेपाल व्यापार एकीकृत रणनीति एनटीआईएसमा रहेका वस्तुहरुको प्रचारप्रसार तथा प्रर्बद्धन गर्ने उद्देश्यले मेला, प्रदर्शनी एवं महोत्सव गर्न लागिएको आयोजक जानकारी दिएको छ । व्यापार मेला तथा महोत्सवमा करिव एक लाख आन्तरिक तथा बाह्य पर्यटक भित्र्याएर तीन करोड वढिको आर्थिक कारोवार गर्ने लक्ष्य राखिएको छ । प्रादेशिक औद्योगिक व्यापार मेला तथा कृषि प्रर्दशनी एवं धनकुटा महोत्सवको मुख्य आकर्षणमा नेपाल एकीकृत व्यापार रणनीतिमा समावेश वस्तुको प्रर्दशनी, औद्योगिक, व्यापारिक, हस्तकला, कृषि तथा जडिबुटीको प्रर्दशन, घरेलु उद्योगवाट उत्पादित वस्तु तथा कला, सँस्कृति झल्कने कार्यक्रम तथा वस्तुको प्रर्दशनी रहने भएको छ । महोत्सवमा प्रर्दशनी स्थल १ सय २५ र फुड स्टल २५ गरि १ सय ५० स्टल रहने आयोजकले जनाएको छ ।