काठमाडौं १८ बैशाख । इलाम क्षेत्र नम्बर २ को प्रतिनिधि सभा सदस्यमा नेकपा एमालेका उम्मेदवार सुहाङ नेम्बाङ विजयी भएका छन्। शनिबार भएको उपनिर्वाचनको अन्तिम मतपरिणाममा सुहाङ २७ हजार ७ सय ७२ मत सहित विजयी भएका हुन्।
नेपाली कांग्रेसका उम्मेदवार डम्बर बहादुर खड्का दोस्रो भए। उनले २१ हजार ९ सय ४२ मत पाएका छन्। विजयी सुहाङभन्दा नेकाका डम्बर ५ हजार ८ सय ३० मतले पछि परे।

त्यस्तै, स्वतन्त्र उम्मेदवार डकेन्द्र सिंह थेगिमले १४ हजार ४ सय ५७ सम्मानजनक मत प्राप्त गरेका छन्। उनी तेस्रोमा रहे। राष्ट्रिय स्वतन्त्र पार्टी (रास्वपा)का उम्मेदवार मिलन लिम्बूले ५ हजार ५० मत भन्दा बढी ल्याउन सकेनन् । यही कारण उनको जमानत जफत भएको छ । लिम्वुले प्राप्त गरेको मत कुल सदर मतको १० प्रतिशत भन्दा कमी ७.३७ प्रतिशत मात्र हो ।

यो क्षेत्रबाट प्रतिनिधिसभा सदस्यमा निर्वाचित नेकपा एमालेका नेता सुवास नेम्वाङको निधन भएपछि शनिबार (१५ वैशाख) उपनिर्वाचन भएको हो।

एमालेले सुवासकै छोरा सुहाङलाई चुनावी मैदानमा उतारेको थियो । बुवाजस्तै स्वभाव मिल्ने सुहाङले बुवाले लगातार २५ वर्षसम्म जित्दै आएको क्षेत्रमा जित हासिल गर्दै संसद् भवनको ढोका खोलेका छन्।

सुहाङ पेसाले अधिवक्ता पनि हुन्। बुवाको निधनपछि उनलाई उमेद्वार बनाएको हो । उनी एमालेका कानुन विभाग सदस्य पनि हुन्।
उनले यसलाई आफ्नो र पार्टीको मात्रै नभई सिंगो इलामेलीको जितको रुपमा लिएको बताए।

साथै, उनले यसलाई बुवा र आफ्नो मात्रै भन्दा पनि सबै इलामेली जनताको विरासतको रुपमा व्याख्या गरे। ‘यो बुवाको मात्रै विरासत होइन, एमालेको मात्रै पनि होइन, यो त सिंगो इलामेली जनताको विरासत हो,’ सुहाङले मतगणनास्थलमा पत्रकारहरुलाई बताए ।

सुहाङको पक्षमा माहोल बनाउन एमालेका स्थायी कमिटी सदस्यहरु शिवमाया तुम्बाहाङ्फे दुई महिनादेखि निर्वाचन क्षेत्रमै खटिएकी थिइन्।

मिहेनत गरे अनुसारको नतिजा आफ्नो पक्षमा पारेर एमालेले सुवास नेम्वाङको विरासत कायम राखेको छ।

एमालेले २०५६ देखि निरन्तर जितेको सो क्षेत्रको कमाण्ड अब ३५ वर्षे सुहाङको काँधमा आएको छ।

‘मैले जुन मत प्राप्त गरेका छौँ, इलामका जनताले हामीलाई माया गर्नुभयो। एमाले लगायतका पार्टीहरु जो–जोले हामीलाई सहयोग गर्नुभएको छ,’ सुहाङले थपे, ‘इलामको समृद्धिका लागि काम गर्न सक्छ भन्ने विश्वासकै कारण उहाँहरुले मत दिनुभएको हो।’

सुहाङलाई अघि सारेर एमालेले युवाहरूको पार्टी भन्ने बाटो खुला भएको छ।

एमालेबाट संसद पुग्ने सुहाङ सबैभन्दा कान्छा सांसद भएको प्रमुख सचेतक महेश बर्ताैलाले बताए।

‘हाम्रो पार्टीमा सुहाङभन्दा कान्छा कोही हुनुहुन्न,’ उनले  भने, ‘एमालेलाई पहिचानविरोधी पार्टी भनेर लगाइएका सबै आरोप सुहाङको विजयसँगै खण्डित भएको छ।’