काठमाडौं १७ बैशाख । मधेश प्रदेशका गृह, सञ्चार तथा कानुन मन्त्री राज कुमार लेखीले पत्रकारिता क्षेत्र र पत्रकारहरुको समस्याप्रति प्रदेश सरकार संवेदनशिल रहेको बताउनुभएको छ । सप्तरीको तिरहुत गाउँपालिका ५ स्थित ऐतिहासिक धार्मिक पर्यटकीय स्थल लोहजरामा नेपाल पत्रकार महासंघ सप्तरीको ११ औं अधिवशनमा उहाँले सो कुरा बताउनुभएको हो ।

मन्त्री लेखीले पत्रकारको समस्याप्रति गम्भीर रहेको बताउनुहुँदै पत्रकारहरुको पेशागत सुरक्षा र संस्थागत विकासको लागि प्रदेश सरकार प्रतिबद्ध रहेको बताउनुभयो । उहाँले पत्रकारिता क्षेत्रमा रहेको तमाम समस्यालाई सम्बोधन हुने गरी कार्ययोजना पेश गर्न र छलफल गर्न पत्रकार महासंघका जिल्ला तथा प्रदेश नेतृत्वलाई आग्रह गर्नुभयो ।

लोक कल्याणकारी विज्ञापानमा प्रदेश सरकारले कटौती गरी पत्रकारलाई सुविधाबाट बन्चित गर्नु न्याय पूर्ण नभएको बताउनु हुँदै प्रदेशभरी रहेका सञ्चार माध्यमलाई दिने सुविधा वार्षिक २५ लाख यो न्यायसङ्गत नभएकोले प्रदेश नेतृत्वलाई ५० करोडको कार्ययोजना बनाएर पेश गरेमा कार्यान्वयन तर्फ लाने जिम्मा आफूलाई भएको बताउनुभयो ।

मन्त्री लेखीले संघ सरकारले बजेटमा प्रदेश सरकार र स्थानीय सरकारमाथि भेदभाव गरी केन्द्रले ८० प्रतिशत बजेट राख्ने र सातवटा प्रदेश र ७ सय ५३ स्थानीय तहलाई २० प्रतिशत बजेट बिनियोजन गरेर केन्द्र सरकारले विभेद गरेको आरोप लगाउनुभयो ।

नेपाल पत्रकार महासंघ शाखा सप्तरीका अध्यक्ष श्रवण कुमार देवको अध्यक्षतामा सम्पन्न कार्यक्रममा नेपाल पत्रकार महासंघका केन्द्रीय सचिब दिपेन्द्र चौहान, आमसञ्चार प्राधिकरण मधेश प्रदेशका अध्यक्ष श्यामसुन्दर यादव, नेपाल पत्रकार महासंघ मधेश प्रदेश अध्यक्ष राजेश कर्ण महासंघका केन्द्रीय सदस्य केसी लामिछाने, पूर्व केन्द्रिय सदस्य अबधेश झा, पूर्व सिंचाइ मन्त्री उमेश कुमार यादव, राजविराज नगरपालिकाकी कार्यबाहक प्रमुख इसरत परविन, तिरहुत गाउँपालिकाका अध्यक्ष विजय कुमार यादव, छिन्नमस्ता गाउँपालिकाका अध्यक्ष विद्यानन्द चौधरी, तिलाठी कोइलाडी गाउँपालिकाका अध्यक्ष अरुण मण्डल, प्रमुख जिल्ला अधिकारी किरण थापा, नेपाल पत्रकार महासंघ सप्तरीका पुर्व सभापति बैथनाथ झा लगायतकाले शुभकामना मन्तव्य व्यक्त गर्नुभयो ।

उद्घाटन समारोह पश्चात् बन्द सत्रमा आर्थिक, प्रगति, साँगठानिक तथा भावी नीति तथा कार्यक्रम प्रस्तुत गरी छलफल पश्चात परिमार्जण गर्ने गरी अवेर राती पारित भएको पत्रकार महासंघ सप्तरीले जनाएको छ ।