काठमाडौं १६ बैशाख ।  कक्षा १२ को परीक्षामा सहभागी गराउन कागजात मिलाएर नक्कली परीक्षार्थी खडा गरेको आरोपमा काठमाडौं प्रहरीले धुम्बाराहीस्थित प्रोलिफिक सेकेन्डरी स्कुलका प्रिन्सिपल गोपालबहादुर महतलाई आईतबार प्रक्राउ गरेको छ ।

महाराजगञ्ज प्रहरी वृत्तले प्रक्राउ गरेको काठमाडौं प्रहरीले जनाएको छ । उक्त स्कुलले प्रवेशपत्रमा विद्यार्थीको सट्टा अन्य व्यक्तिको तस्बिर राखेर परीक्षा दिने तयारी गरेको उजुरी परेको थियो । शिक्षा मन्त्रालय, राष्ट्रिय परीक्षा बोर्डमा उजुरी परेपछि शिक्षा मन्त्रालय र बोर्डले कार्बाहीका लागि गृह मन्त्रालय र काठमाडौं महानगरपालिकालाई आग्रह गरेका थिए ।

उक्त स्कुलका १२ जना विद्यार्थीमध्ये ५ जना विद्यार्थीको रजिष्ट्रेशन गर्दाको तस्बिर र प्रवेश पत्रको तस्बिरमा फरक परेको बोर्डकी बागमती प्रदेश कार्यालय प्रमुख जयन्ती सत्यालले जानकारी दिईन् ।

बोर्डकाअनुसार विद्यार्थीहरु दीपक महत, तिलबहादुर महत, प्रशान्त बिष्ट, मुकेश चन्द र विवेक न्यौपानेको प्रवेश पत्रमा अन्य व्यक्तिको तस्बिर राखिएको थियो । उनीहरुको सट्टा तस्बिर राखिएका व्यक्तिहरुलाई परीक्षामा सहभागी गराउन लागिएको अंशका गरिएको छ । प्रहरीले अनुसन्धान भईरहेको जनाएको छ । विद्यार्थीहरु दीपक र तिलबहादुर प्रिन्सिपल गोपालबहादुरका भाईहरु रहेको विद्यालय स्रोतले जनायो ।

शिक्षा मन्त्रालयमा सिम्बोल नम्बर २२७३३४०६, २२७३३४०७, २२३७४०९, २२७३३४४१ भएका विद्यार्थीको नक्कली परीक्षार्थी बनाई प्रवेश पत्र बनाएको उजुरी परेको थियो । उक्त उजुरीका आधारमा मन्त्रालयले गृह मन्त्रालयलाई कारवाहीका लागि पत्राचार गरेको थियो । कक्षा १२ को परीक्षा वैशाख १४ गतेबाट सुरु भएको छ । नक्कली परीक्षार्थीलाई उक्त परीक्षामा सहभागी गराउन खोजिएको आंशका छ ।