काठमाडौं ११ फागुन । प्रमुख प्रतिपक्षी दल नेकपा एमालेले विभिन्न विवादमा मुछिएका वर्तमान मन्त्रिपरिषद्‌का तीनजना मन्त्रीका विषयमा प्रधानमन्त्री पुष्पकमल दाहाल प्रचण्डले तत्काल जवाफ दिनुपर्ने जनाएको छ।

गत पुस १३ गते भएको बालकुमारी घटनाका मुख्य दोषी मानिएका भौतिकमन्त्री प्रकाश ज्वाला, टेरामक्स प्रकरणमा बयान दिएका स्वास्थ्यमन्त्री मोहन बस्नेत र रामग्राम क्षेत्रको जग्गामा जोडिएका पर्यटन तथा संस्कृतिमन्त्री सुदन किरातीबारे एमालेले प्रधानमन्त्रीको जवाफ मागेको हो।

शुक्रबार बसेको प्रतिनिधि सभाको बैठकमा बोल्दै एमाले सांसद् एवम् पार्टी सचिव योगेशकुमार भट्टराईले बालकुमारी घटनाको नैतिक जिम्मेवारी गृहमन्त्री नारायणकाजी श्रेष्ठले पनि लिनुपर्ने अडान राखेका छन्।

जाँचबुझ आयोगले बुझाएको प्रतिवेदनमा रहेको कुराबारे संसद् चलिरहेकाले यहीँ सरकारको जवाफ आउनुपर्ने उनले बताए। उनले यस प्रकरणमा प्रधानमन्त्रीले संसद्लाई बताउनुपर्ने उल्लेख गे।

संसद् व्यवस्थित रुपमा अघि बढोस् भन्ने चाहेको भन्दै सत्तापक्षबाटै प्रतिपक्षीमाथि भ्रम फैलाएको आरोप पनि एमालेले लगाएको छ।