अर्घाखाँची,१ फागुन । सन्धिखर्कको शान्तिबगैंचा र सन्धिखर्क नगरपालिकाको गेटमा कण्डम बक्स राखिएको छ । आज फागुन १ गते कण्डम दिवसको अवसरमा यी दुई स्थानमा कण्डम बक्स राखिएको हो । प्रेम दिवसको पुर्व सन्ध्यामा सन्धिखर्क नगरपालिका, स्वास्थ्य कार्यालय अर्घाखाँची, मल्लरानी ग्रामिण विकास सरोकार केन्द्र र सन्देश सहयोग समुहको संयुक्त आयोजनामा सन्धिखर्कमा कण्डम दिवस मनाइएको हो । असुरक्षित यौन सम्पर्कबाट हुने रोकबाट बच्न तथा परिवार नियोजनका लागि कण्डमको प्रयोग गर्नुपर्ने स्वास्थ्य कार्यालय अर्घाखाँचीका सुचना अधिकारी विजय विकले बताए ।

उनले कण्डमलाई परिवार नियोजनका रुपमा मात्र नलिई यौनजन्य रोगबाट बच्न समेत कण्डमको प्रयोग आवश्यक रहेको जानकारी दिए । “हामीले कण्डमलाई परिवार नियोजनका रुपमा मात्र बुझेका छौं, त्यतिमात्र नभइ असुरक्षित यौन सम्पर्कबाट हुने संक्रामक रोगबाट बच्न समेत कण्डमको प्रयोग गनुपर्छ ,” उनले भने “परिवार नियोजनको रुपमा सबैभन्दा महत्वपुर्ण, सहज रुपमा पाउने भनेको कण्डम हो, जन्मान्तर कायम गर्न समेत कण्डमको प्रयोग गर्न सकिन्छ ।” प्रत्येक वर्ष फेब्रेवरी १३ मा कण्डम दिवस मनाइन्छ । यस वर्ष पनि विभिन्न कार्यक्रम गरी विश्वभर कण्डम दिवस मनाइएको छ । विश्वमा यौन रोगहरु बढ्दो अवस्थामा छन् । प्रजनन एवं यौन सचेतनामुलक काम गर्दै आएका संघसंस्थाले गाउँ तथा सहरहरुमा विभिन्न चेतनामूलक कार्यक्रम गरी यो दिवस मनाएका हुन् ।

नेपालमा अझैपनि कन्डमको प्रयोग गर्नेहरुको संख्या थोरै नै रहेको आकलन गर्न सकिन्छ । कण्डम अझैपनि सबैको पहुँचमा पुच्न सकेको छैन् । कन्डमको प्रयोग नगर्ने समुदायमा यौँन रोग बढ्दै गएको र यसबारे नकारात्मक धारणा हटाएर कण्डमको महत्तवबारे बुझाउने खालका कार्यक्रम गर्न आवश्यक रहेको विज्ञहरु बताउँछन् । सन्धिखर्कमा राखिएका दुईवटा कण्डम बक्सलाई नगरपालाले नियमित रुपमा अपडेट गर्ने सन्धिखर्क नगरपालिका स्वास्थ्य शाखा प्रमुख पुर्ण प्रसाद पराजुलीले जानकारी दिए । उनले नागरिकको आवश्यकतालाई मध्यनजर गर्दै नगरपालिकाले शान्तिबगैंचा र नगरपालिकाको कार्यालय गेटमा कण्डम बक्स राखिएको बताए ।

“विभिन्न किसिमका एचआईभी जस्ता यौन रोगबाट बचाउन कण्डम सबैको पहुँचमा पु¥याउन कण्डम बक्स राखिएको हो,” उनले भने “चाहिएजति कण्डम यी बक्सबाट झिक्न सकिने छ ।” परिवार नियोजनको अस्थायी साधन कण्डम यौन रोग सर्नबाट बचाउने भरपर्दो साधन हो । कण्डम मात्र एउटा यस्तो साधन हो जसले गर्भवती हुन र धेरै यौनरोगहरु नर्सन सहयोग पु¥याउन्छ । असुरक्षित यौन सम्पर्कले मानिसमा विभिन्न संक्रामक रोगहरु लाग्न सक्ने सन्देश समुहका कार्यक्रम अधिकृत पार्वता थापा केसीले बताइन् ।